Shillong, Jylliew 25: Ka MSSASA kala dew biang ia ka jingbkal jong ka NIOS ha kaba pynmih ia ka result jong ka Diploma in Elementary Education (D.El.Ed) kaba dei jong ka kynhun ba nyngkong jong u snem 2013 ha kaba ia ka result la pynmih ha ka 22 tarik mynta u bnai da kaba thok dak saw bad kane ka dei ka sien kaba lai ba kila pynmih ia ka result bad ia kane ka juh ka jingbakla kila leh ruh ha u snem 2016.
Ha kaba pynmih ia ka result, ia ka Internal Assessment paper marks la ai hynrei ha ka theory paper pat ki dang ai ba pep ko nonghikai wat la ka dei na kajuh ka jaka ai jinghikai bad ha kaba ia dei bad ka Workshop Base Activities (WBA) bad ia ka Practice Teaching pat la pynneh kum juh bad ia ka kyrteng kmie bad kpa jong ki nonghikai ki la kum juh baroh.
Kaba kham sngew lyngoh eh na ka bynta jong ki ka long ba u Director jong ka DERT u T.G.Momin ha ka jingiakynduh bad ki dkhot jong ka seng ka Meghalaya SSA Schools Association ( MSSASA ) ha ka 22 tarik mynta u bnai u la ong ba haduh mynta kam pat don kano kano ka jingbethah na ka liang jong ka NIOS ban pynjlan ia ka por. Bad kumba la thoh ha ka Notice Board ka long ba ka bai eksam kan long 300 tyngka na ka bynta kawei ka subject bad ka eksam kan long ha u Risaw bad Naiwieng.
Na ka liang jong ki nongialam jong ka MSSASA kila pyrshang ban wad jingtip na ka Dr D Pyrbot kaba dei ka ophisar ba dei peit ha kane ka jylla la ong ba kala shim shuti, katba ki nongtrei ha ophis pat kim don wat tang u wei ruh sha ei ki jah kylli ka MSSASA. Na ka liang jong ka seng ka don ka jingsuba ia kane ka rukom leh jong ka NIOS ha dien ba kala pynmih ia kine ki kynrum kynram baroh ha kaba ia dei bad ki nonghikai.
