Shillong, Rymphang 18: Ki shipai BSF kiba dei peit ia ka pud ka sam jong ka Ri India ha kane ka jylla Meghalaya kila ia leh pyrshah ban khang ia ki kam khaii beain ha khappud bad ka Banglasesh.
Ki BSF ki don ha West Garo Hills District kila trei shitom bad kila ioh ban kem ia ki nongkhaii beain bad ki tiar kiba la kot sha ka T.21 lak tyngka kiba la thmu ban shallan sha Bangladesh.
Kane ka jingioh kem jong ki BSF ia kane ka jingkhaii martuh sha Bangladesh ka long ha dien ba kila ioh ia ka jingtip kaba bniah ba ki don ki briew kiba leit sha khappud bad ka Bangladesh ryngkat ki jingkit.
Ki BSF kila pynlong ia ka jingkhang kdong hynrei na ki daw jong ka jingdum ka miet kila ioh ban phet krad na katei ka jaka, ki BSF kila ioh ban kurup ia ki mar khaii beain bad kila aiti sha ki bor jong ka ain ban leh ia kaba don kam, ki BSF ki long kiba peitngor ban pynthikna ba ki kam beain ha khappud kin duh kin dam.
