Shillong,Nailur 21: Ka kynhun shipai iada khappud bad ka Bangladesh, ki shipai BSF kila ioh jingtip ba don ki lehnoh kiba la wan kiew na Bangladesh sha India ryngkat ki tiar ialeh, halor kane ka jingtip ki shipai BSF kila pynap ktem bad kila ioh ban kem ia u ne u dkhot jong ka seng lehnoh ULFA ryngkat ki tiar ialeh na Kachhuadogri, West Garo Hills district jong ka jylla Meghalaya.
Une u lehnoh haba la ngat ha kti jong ki BSF u la phla ba u dei na Bangladesh bad u la ia don kti bad ka seng ULFA mynta la lai snem lynter bad u dei na ka shnong Badagazni bad ka kyrteng jong u ka dei Peramisom Marak, kane ka shong jong u ka hap hapoh jong ka Jhenaigati, District-Sherpur jong ka Ri Bangladesh.
Ki BSF kila ioh ban kurup kawei ka pistol 9 mm pistol, ar tylli ki 9 mm mag, bad phra tylli ki kuli kiba khlem pat pyndonkam , la ioh ruh ia ka sim card kaba dei na Bangladesh.Une u dkhot jong ka seng lehnoh ULFA u la iathuh ba u don ka jingiadei kaba jam bad u Dristi Rajkhowa Dy. C-in-C, ULFA bad ki nongsynran jong u namar ba u juh shllan tiar siat sha ki.
U la phla shuh shuh ba u juh iarap ia ki dkhot ka ULFA kiba don ha Bangladesh ba kin kiew sha India da ka jingdon lang ki briew na kane ka Ri India kiba juh iarap ia ki. Na ka liang jong ki BSF mynta kin pynlong ia ka jingtohkit ban lap ia kito ki briew kiba juh ai jingkyrshan ia ki. Ha dien ba la tohkit la aiti noh sha kibor pulit.
