Shillong, Jylliew 30: Ka sunjuk jong ki Rangbah shnong ka thain Phlangdiloin kaba kynthup ia ki 17 tylli ki shnong ki dawa ia ka Khasi Hills Autonomous District Council (KHADC) ba ka dei ban ai noh ia ka No Objection Certificate ban shna ia ka surok na Nongstoin sha Ranikor,
Haba kren ha ki nongthoh khubor mynta ka sngi u Bah Christopher Lyngdoh u la ong ba katkum ka jingkhot tender jong ka tand shna surok jong ka sorkar pdeng ha ka 5 tarik jong u bnai Jymmang 2014, kala khot lang ia ki ar tylli ki surok kawei na Nongstoin sha Wahkaji kaba jngai kumba 68 Km bad kawei pat na Wahkjai-Phlangdiloin sha Ranikor kaba jngai kumba 30km.
U Bah Lyngdoh u la ong ba kumba ka paw na ka tnder kaba la khot da katei ka tand sorkar kam shym don kata ka jingong ban shna surok ban tih Uranium, kat kum kane ka tender ki dawa ba ka KHADC ka dei ban ai noh ia ka NOC ban shna ia kine ki ar tylli ki surok namar ki paidbah ki don kam ia kine ki surok, haba ia ei bad ka kam tih Uranium ki ruh ki pyrshah.
Ka KHADC ka dei ban ai noh ia ka NOC ban shna surok, bad na ka bynta ka kam tih Uranium kam dei ban ai, “ Ngi kyrpad ia u CEM u Bah PN Syiem ba un ai noh ia ka NOC”. Halor ka jingong kiwei ki seng bhalang ba dei ban bha ia kane ka surok kaba don mynta, na ka liang jong ka synjuk ki ong ba ka bha lada pynbha hynrei lada ioh syndon da kaba surok ba lah ban iaid saw tylli ki kali ha ka juh ka por ruh ka biang eh.
U Bah Victor Lyngdoh u wei na ki sordar ba la ia don lang u la ong ba “ Ngi la juh khot ia ki jingialang paidbah ban ia kren ia kane ka kam surok, bad ki paidbah ki kwah ban ioh ia ka surok, khamtam eh na Wahkaji sha Ranikor ka long kaba don bha khamtam ka Block ka don ha Ranikor.
U Bah Jeffery Dkhar u ba dei ruh u wei na ki trai jaka ba kane ka surok kan iaid u la ong ba kiba pyrshah ia kane ka surok ki don tang katto katne ngut hynrei ki paidbah ki kwah ban ioh ia ka surok, ki paidbah kane ka thain ki don kumba 3500 ngut, ia kane ka development kaba la wan ha kti kam dei ban duh. La ong ba kum ka synjuk kin leit ban ia kynduh ia u CEM ka KHADC ban dawa ba dei ban ai noh ia ka NOC ban shna surok bad ym dei ban ai NOC pat na ka bynta ban shna surok. Ha kane ka jingiakynduh ia ki nongthoh khubor baroh khat hynniew tylli ki shnong kila phah ia la ki jong ki nongkit kam shnong ban ia donlang ha kane ka sngi.
