Shillong, Rymphang.05: Da ki phew tylli ki bulp light, ki television kynthup ruh ki motor tan um, ki washing machine bad ki refrigerator hapoh ka shnong Umshing ki la julor na ka jingkhlain kynsan jong ka bording lane lah ban ong ka jingwan high voltage, kane kala jia ha ka miet sngi saitjain.
Katkum ka jingiathuh jong ki nongshong shnong katei ka shnong, kane ka jingkhlain kynsan jong ka bording ha katei ka shnong ka la jia hynnin ka miet ha ki por ba ki briew ki dang peit tv bad ruh ki dang tan um ban pyndap um ha ki top.
Kawei na ka longkmie ka la iathuh, ka jingkhlain kynsan ka bording ka la wanrah ia ka jingjulor kaba ka jingduhnong ka la palat ia ki phew hajar tyngka namar baroh ki jingdon jingem kiba dei ki tiar electronics ki la duh lut.
Uwei u rangbah pat u la ong, ka jingkhlain kynsan ka bording ka la pynkyndit ym tang ia u hynrei wat ki ksew kiba u ri ruh namar ka jingkhlain jong ka jingwan ka jingshai ha ki bulp. Hadien ka jingkhlain jong ka jingwan ka bording, ki don katto katne tylli ki iing kiba la hap ban shong dum namar ka jingshah pynjulor ki bulp.
La iathuh ruh ba ka jingkhlain ka bording ka la long baroh shimiet bad bteng haduh mynstep, kaba pynlong syndon ïa ka MeECL ban pynlip bording shipor hapoh katei ka shnong.Lait na kitei ki tiar, ka ladon ruh ka jingshah ktah ha kaba dei bad ka jingsniew ki kompiwtor bad ki mobile ruh namar ka jingleit ban charge ha ka por ba khlain kynsan ka bording.
Kaba donbok ka long, ba kane ka shnong kaba don ruh ia ki iing tap shilliang kam shym la mad kano kano ka jingsngewsih namar ka jingkhlain kynsan ka bording kadei ha ka por ba rkhiang ym ha ka por ba jaw slap. Kine ki nongshong shnong, ki la ong ba ia mynta kin ujor shuwa ha ka dorbar shnong ba kan leh ia kaba donkam ban ïakren bad ka tnat MeECL.
