Shillong, Nailur 19: U bah Roy kupar Synrem President ka seng Hynñiewtrep Youth Council (HYC) la kynnoh ba ki kam bamsap bad ka jingthok jingshukor ia ki paidbah ba ka ka la lap dang ha ki bnai ba ladep lyngba ka jingtohkit halor ka jingkynnoh bamsap na ki tin sop ïing lane ki Aluminium Roofing Sheets kiba la ai sha ki Community and Rural Development (C&RD) Block bapher bapher ban sam pat sha ki nongshong shnong kiba dei hok ban ïoh khamtam kiba shah lynshop ha ki bor mariang.
Haba kren ha ki lat pathai khubor u bah Roy Kupar la ong ba sa shisien pat lyngba ka jingwad Right To Information (RTI) bad na kiwei pat ki tyllong jingtip ha ka 19 tarik u Nailur, 2024, ka la lap ia ka jingai kontrak sop sop ka tnad Director of Housing ka Meghalaya ia ki Tin sop ïing ne ki Aluminium Roofing Sheets sha ka kompeni M/s Hariana Iron Works Pvt. Ltd ha kaba ka mang tyngka kala kot kumba T.189 klur eiei khlem da khot tender eiei.
Ha ka jingiakren bad ki nongthoh khubor na ka liang u President ka HYC u bah Roykupar Synrem u la ong ba ngin sa leit buh da ka jingujor sha ka PAC ha ka por kaba biang ban dawa tohkit ia kane ka kam bad ban shim ia ki lad ki lynti kiba donkam ban pynbeit.
U la ïathuh ba lyngba ka RTI la lap ba u Director ka tnad Housing lyngba ka notice ha ka 11 tarik u Rymphang, 2022, u la khot quotation na ka bynta ban pynbiang ïa ka ‘Corrugated Aluminum Roofing Sheet ha ka AA3105H18 Alloy’ ba jrong 8 phut 800 MM ka jingheh bad jingrben ba 0.45 mm, na ka bynta ka dor Tender kaba long kumba T.20 klur.
Ka Departmental Tender Committee jong ka tnad Housing kaba la shong jingialang ha ka 16 tarik u Lber, 2022, ka la pdiang ia ki dor ba la buh da ka M/s Hariana Iron Works Pvt. Ltd T.17,989/- shi bundle kaba long ka dor kaba duna tam na kiwei pat ki nongbuh dor.
Hadien kata, la pynmih ïa ka Supply Order ha ka 18 tarik u Lber, 2022 na ka bynta ban pynbiang ïa ki 11,118 bundle ki tin ïing ha ka dor kaba T.20,00,01,702 tang da u Director ka tnad Housing, Meghalaya, Shillong.
Ha ka 25 tarik u Lber, 2022, ka Departmental Tender Committee jong ka tnad Housing, halor ka jingtyrwa jong u Director ka tnad Housing, Shillong, ka la rai ban pynbun ïa ka jingthied ia ki Aluminium roofing Sheets sha ka 25,790 tylli kata sa kumba 14672 bundle ka ban pynbiang da ujuh u supplier bad ha ka 4 tarik Nailar, 2022, u Director ka tnad Housing, Shillong, ula pynmih ïa ka Supply Order sha ka M/s Hariana Iron Works Pvt. Ltd kaba kot haduh T.26,39,34,608.
“Khlem da khot ia ki Tender thymmai bad nalor ka supply order bynrap sa 14,672 bundle bala kdew haneng, u Director jong ka tnad Housing, Shillong, u la ai sha ka M/s Hariana Iron Works Pvt. Ltd ban pynpoi ia ki mar kiba long kumne harum:
- Supply order dated Shillong, the 11th Nailar, 2022 – T 69,64,98,608/-.
- Supply order dated Shillong, the 2nd Kyllalyngkot, 2023 – T. 23,22,37,990/-.
- Supply order dated Shillong, the 5th Nailur, 2023 – T. 49,72,15,960/-.
- Supply order dated Shillong, the 6th Rymphang, 2024 – T.19,89,94,318.
U Bah Roy Kupar u la pyntip ruh ba ka Departmental Tender Committee, ka tnad Housing, ryngkat bad u Director ka tnad Housing, Shillong ki la rai lang ban ai Supply order sha ka M/s Hariana Iron Works Pvt. Ltd ba kot T.188,88,81,484, khlem da khot ia kino kino ki Tender ne quotation.
