Shillong, Nohprah 13: Ka FKJGP Mawsynram Circle ka dap da ka jinglyngngoh kaba khraw eh halor ka jingieh shrah bad pynsah iing jah na kaliang ka tnad treikam jong ka Sorkar Jylla lyngba ka Forest Department ha kaba ka la dep ban tei ia ka ophis treikam hapoh ka Shnong Mawsynram la bun snem mynta khlem dalah pat ban pyntreikam eiei ruh em, kaba la pynkylla long pynban ban mih da sop da ki niut ki nier bad ki phlang. Haba nakaliang jong ka Seng kala leit ban peit khnang ban lap iaka jingshisha la iohi ba bun na ki iit bad ki jingkhang ki la pait lut kumjuh ruh ki tin tap na ka tnum.
Ka seng halor ka ne ka bynta ka pynpaw ia ka jingsngewdiaw kaba jur bad ong ruh ba kalong kum shi bynta ka jingbym khein snep ban leh bym suid niew na katei ka tnad kaba dei khmih bad sumar iaki khlaw ki btap ka Forest Department kaba la wan ban shna bad buh ia kiei kiei khamtam ki jingtei kum ki ing ki sem bad ki ophis treikam hynrei pynban la shu ieh khlem da pyntreikam. Ka Seng ka pynrem jur ia kane ka jingleh jong ka tnad Forest bad ong ruh ba ngi kwah ban ioh iaka jubab kaba shai halor kane ka mat.
Katkum ka jingiakren na ki nongialam jong ka seng bad katto katne ki nongtrei jong katei ka tnad la sngewthuh baka jingtei ia katei ka ing hapoh Mawsynram kalong lyngba ka Tnad Territorial Division jong ka Khasi Hills kaba hap hapoh ka jingkhmih jingpeit jong u DFO na kane ka tnad kum shi bynta ban kham pynsuk ha kaba lum ia ki khajna kum ha u Dewiong, Mawshun bad kiwei kiwei ki mar poh khyndew kiba pynmih napoh khlaw.
Ka seng kan sa leit ban ia kynduh iaki bor kiba halor jong katei ka tnad ban iakren halor kane ka mat ban pynpaw hakhmat jong ki ba lada kimlah ban pyndonkam shuh ia kane ka ing kim dei ban shu ieh kumto kumba long mynta hynrei ka tnad kadei ban aiti noh sha ka Dorbar Shnong Mawsynram kaba la ai sngewbha ia ka jaka khang ba kinlah ban ioh ban pyndonkam ha kiba bun ki bynta naka bynta ki kam ha kaba iadei bad ka shnong ka thaw bad ka jingmyntoi ki paidbah.
