Khot ka sorkar ia ka jinbgshong dorbar ba kyrpang ban pass ia Meghalaya GST Bill’s 2017

Shillong, Jylliew  05: U myntri rangbah jong ka jylla u Dr Mukul Sangma u la ong ba ka sorkar  kala khot ia ka dorbar ba kyrpang jong ka iing dorbar thawain ka jylla ban pass “Draft Meghalaya GST Bill’s 2017”. Kane ka dorbar ba kyrpang kan long ha ka sngi nyngkong jong ka taiew ban wan.

Haba kren ha ki lad pathai khubor ha dien ba la wai ka jingialang jong ka cabinet mynta ka sngi na ka liang jong u myntri rangbah u la ong ba ia ka Gross State Tax (GST) yn pyntrei kam noh hapoh ka jylla naduh ka 1^st Naitung 2017 bad baroh ki jaid khajana kin long noh tang hapoh jong katei kawei ka ain ha ka Ri India ia kaba la tip kum ka GST ban leh ia kane don kam ban da pass ia kane ka ain hapoh ka iing dorbar thawain ka jylla.

U Dr Mukul, u la iathuh ba u la thoh sha u Lat jong ka jylla u Banwarilat Purhohit, u la thoh sha u shongknor jong ka iing dorbar thawain ka jylla u AT Mandal ban khot ia kane ka jingshong dorbar kaba kyrpang ban pass ia ka Draft Meghalaya GST Bill’s 2017 hapoh ka iing dorbar. Ia kane ka dorbar kaba kyrpang yn pynlong ha ka 12^th Naitung 2017 ka sngi nyngkong ban wan.

U myntri rangbah u la ong ba ha kane ka ain thymmai jong ka GST ka don ka kyndon kaba la the da ka ain kaba ong ba lada kano kano ka jylla ka don ka jingduhnong da ka jingpyntrei kam ia kane ka ain kaba khajana kaba thymmai ka sorkar pdeng kan hap ban beit ia ka jingduh jong kata ka jylla. Katkum ka jingkhein ka long 14% bad u Dr Mukul u kyrmen ba ka jylla Meghalaya kan tam ia katei kaba la buh.

Ha kane ka sngi na ka liang jong ka cabinet ruh kala pdiang ia ka jingtyrwa jong ka tand ka kit ka bah jong ka sorkar jylla ban don noh ia ka ‘State Road Safety Policy’ bad kajingthmu jong kane ka policy ka long ban iada na ka jingia tyngkhuh kali kaba la wan rah ia shibun ka jingduh ki mynsiem briew ha kane ka jylla. La ong ba ka sorkar kan sa buh ia ka jaka hikai niah kali ha baroh ki District jong ka jylla.

Ka cabinet ruh mynta ka sngi kala pdiang ia ka jingpynjlan ia ka jingtrei kam jong u nongaibuit ba rangbah hapoh jong ka MeECL  ha kaba ia dei bad ka rukom pynmih bor ding ha ka jylla bad kumjuh ha kaba ia dei bad ka jingpynpoi ia ka bor ding sha ki shnong ki thaw.