Shillong, Risaw 14: u Chief Executive Member jong ka KHADC u Bah PN Syiem u ba dei u MLA bad MDC jong ka seng Congress u la ong ba “ Haduh mynta ngam pat ioh da ka jingthoh ba la saspon ia nga na ka seng Congress, kaei kaba nga tip ka long tang da ka ktien”.
Haba kren ha ki nongthoh khubor mynta ka sngi ha kamara trei kam jong u hapoh KHADC, u Bah Pynshngian u la u la ong “ La don ba ong ia nga ba la saspon shisnem ia nga, bad kata ka paw ha ka jingkhot ia ka parliamentary party (PP) mynta ka mieit kaba la thoh da u Bah James S Lyngdoh Working president jong ka MPCC”.
La batai ba “kane ka jingkhot ia ka PP mynta ka miet ia baroh 10 ngut ki MDC ha kaba Ia nga khlem khot shuh, kine ki dak ki shin ki paw bala saspon ia nga na ka seng Congress shisnem, bad kane ka paw shai baka don ei ei sha lyndet, bad lehse ki lah ban pynpoi sha nga ia kata ka jingpyntip hynrei haduh mynta ngam pat ioh pdiang da ka jingthoh”.
Halor kane “ Na ka liang jong nga ngam don kano kano ka jingsngew, haba kum ki nongmih khmat ka long ba ngin bat ia ka ishu kaba long na ka bynta ka jingmyntoi jong u ba bun ba lang,ngan nym lah ban pyndem. Lada saspon ia nga, kan nym ktah ei ei ia ka jinglong MLA jinglong MDC ngan iai beteng ban long CEM lada nga ioh ia ka jingshaniah jong ka iing”.
La ong shuh shuh “Lada saspon ka long ba shipor ngam dei shuh u dkhot jong ka seng congress, ha dien shisnem ngan sa peit ka por, kan sa batai, katkum ki dak ki shin ka wan shuwa ka jingpyntip ba la saspon ia u bah Pynshngian shisnem phi dei ban poi sha ka PP shibit, bad shibit ngin jied noh ia u PP, bad kata ruh ka paw shai ha kane ka shithi, ha kaba ki khlem pyntip shuh ia nga, bad kane ka long ba nga la shah saspon”.
La beteng da kaba ong “halor kane ka nongrim ban khot ia ka PP khlem da khot ia nga, namar ka PP kala jied ia nga kum u nongialam jong ka PP, u secretary u dei u Bah Antonio War, ban khot ia ka PP ka dei ka kam ka jong ngi, kam dei ka kam jong ka party”.
U la ong shuh shuh, kum ka nuksa, hato ka party ka lah ban khot CLP, hato ki khot pp kumno khlem da khot ia nga, lada ki shim ia kano kano ka rai ka shong ha ki ngan lah ban ong ei ei namar mynta nga dang dei u congress”.
