Shillong, Nohprah 15: U nongialam jong ka seng RSS u V Bhagaiah u ba bat ia ka kyrdan kum u Joint Secretary mynta ka sngi u la wan poi ha kane ka nongbah Shillong ha ka sien kaba nyngkong eh ban ia kynduh ia ki briew jong kane ka jylla ha Aurobindo Ashram, ha kaba u la ong ki Hindu, Muslim bad ki Khristan ki dei ban imloang ha ka jingiasuk , bad to ngin ieit ia la ka jong ka Ri.
Haba pynshai paidbah ha kaba ia dei bad ka seng RSS, u la ong ba “ Ngi im ha ka Ri kaba laitluid, ngi ieit iala ka jong ka Ri, ngi ieit ia u para briew, ngi sngew ba ka pyrthei ka dei ban don ha ka jingshong suk shong sain bad ngi kwah ba ka pyrthei kan don hapdeng ka jingsuk” la ong u Bhagaiah.
Haba phai hapoh ka Ri India la jong u Bhagaiah, u ong ba ngi don bun ki jaid ktien ba ngi kren la ka long ha ka ktien Bengoli, Khasi, Marathi, Kanada, Manipuri ban shu jer katto kane ki ktien, hynrei ka ktien Hindi ka long tang kum ka ktien pyniasoh kaba ia sngewthuh lang ha kaba ia kren ia khana.
Haba poi sha ka niam, la ong ba ka RSS ka burom ia baroh ki jaidniam, ym dei ban niew bein ia ki para jaid niam baroh, ka wei ka niam kan nym lah ban wan rah jingsuk ha ka sla pyrthei, namar u blei u don tang u wei, hynrei la mane ia u ha ki dur bad rukom bapher bpaher.
U ne u nongialam ka RSS, u la ong ba u don tang u wei u blei, ha kaba ki Muslim ki khot u Allah, ki Khristan ki ong u Jisu bad kiwei ki niam ki khot da ka kyrteng bapher bapher bad ki don ruh ki briew ki bym ngeit blei, hynrei ban poi sha ka jingshisha u don tang u wei u blei, ka naim kan nym lah ban ai jingim ia u briew hynrei ka jinglong hok jong u briew kan ai jingim ia u, la ong u Bhagaiah.
Ka jingklumar baroh kamih, tang lada ka don ka jingkam ba dei tang ka niam jong u ne kata ka briew ba ki ong ka lah ban ai jingim, ki wei kim lah ban ai jingim hangne ka mih ka jinghuri hura, kum ki briew dei ban peit ia ka jinglong tynrai jong ki, ka Ri India ka dei ka Ri kaba don bun ki paidbah bynriew dei ban burom ia kilada niew bein ia kiwei ka mut ba shkun ia ki.
U ne u nongialam jong ka RSS u la kyntu ia ki paidbah nongshong shnong jong ka Rib a dei ban ieit iala ka jong ka Ri bad haba ieit iala ka jong ka Ri, haba trei ha kano kano ka kam trei da ka jingkhuid jingshida kane ka dei ka phang jong ka seng RSS, haba ieit iala ka jong ka Ri yn nym lah ban bamsap bampong, haba ieit ia ka Ri dei ban kylla ka pyrkhat ka pyrdain kam dei ban don ka jingianiew bein u wei ia u wei ha khmat ka RSS baroh ialang ka juh. U la ong.
