Shillong, Naitung 30: U Bah HS Shylla Chief Executive Member jong ka Khasi Hills Autonomous District Council mynta ka sngi u la kren shai kdar ba baroh ki khlieh nongsynshar, ki Syiem, Sirdar, ki Lyngdoh, Wahadadar kihap hapoh jong ka District Council, ym hapoh jong ka Grnad Council jong u Bah John F Kharshiing.
Kane jingkren jong u Bah Shylla ka mih halor ka jingkynthoh jong u Bah John F Kharshiing ia ka Bill jong ka KHADC kaba la pass da ka iing dorbar, ha kaba u Bah John u la ong ba dang don kam ban ia thir halor ka bill jong ka KHADC kaba ong ba ki kynthei khasi kiba ioh lok da u bym dei khasi kin duh noh ia ka jinglong Schedule Tribe ka jong ki.
U CEM jong ka KHADC u la ong ba ka Grand Council ka dei ka seng jong u Bah John F Kharshiing kam dei ka seng kaba ki khlieh nongsynshar ki hap hapoh jong katei ka Federation kumba la kam da u Bah John hynrei ki khlieh nongsynshar ki hap hapoh jong ka District.
Ka District Council mynta kan sa thoh sha baroh ki khlieh nongsynshar ba kren shai ia ki ba ki hap ban kohnguh ia ka District Council ym ka Grand Council jong u bah John Kharshiing, ki khlieh nongsynshar ki dei ban sngewthuh ia kane.
