Shillong, Lber 16: Ka National Women Commission (NCW) kala pynlong ia ka jingialang jong baroh ki State Women Commission ba dei jong ka dong shatei lam mih ngi mynta ka sngi ha nongbah Shillong ha kaba bun kila ia wan ban ia shim bynta.
Ka phang pdeng jong ka ne ka jingialang mynta ka sngi ka long ban ai bor ia ki kynthei ha ki kam kamai kajih. Ha ka jingkren jong ka Chairperson jong ka National Commission na ka bynta ki kynthei, ka Rekha Sharman kala ong ba ki long kmie kane ka thain North East ki don bynta bha ha ki kam kamai kajih.
Wat ki kynthei ki don ia kane ka lad, hynrei kumba ka long ym pat lah pat ban ai ia ki ia kata ka bor kaba pura ban kin long shisha kita ki ba lah ban ia shim bynta pura ban kyntiew ha ka kamai kajih. La ong ba kan long kaba eh ban ia kren ia ki kam pynroi ha ka Ri lada 50% na ki kynthei ki dang sah ieh sha dien.
Ka Chairperson jong ka NCW kala kyntu ia ki long kmie kane ka thain ba kin shim ia kabu ban pyndon kam ki lad pathai khubor kaba katkum kane ka juk kaba mynta kumno ban pyniaid iew ia ki kam kaba ki trei namar ka jinglong kane ka thian NE ka iapher na kiwei ki bynta jong ka Ri.
Ka Soso Shaiza, dkhot jong ka NCWm kala batai bniah ia ki jingeh kaba ki kynthri ki ia kynduh ha kaba ia dei bad ki kam kamai kajuh bad ha ka juh kala kdew ruh ia ki lad ki lynti kumno ban lah ban ialeh pyrshah ia kine ki jingeh.
Ha kane ka sngi la ioh jingkren ruh na ki san ngut ki long kmie kiba la lah ban kiew ha ka kamai ka jih, ka Tanushree Hazarika, ka Leena Saikia, ka Lakshmi Baruah, ka kong Janessaline M Pyngrope bad ka kong Queency Thangkhiew. Ia ka jingkren pdiang burom la kren da ka kong Theilin Phanbuh, Chairperson jong ka Meghalaya State Commission na ka bynta ki kynthei.
