Shillong, Naitung 06: Ka Meghalaya mynta ka sngi ka la sdang ia ka Think20 (T20) conference ha Shillong ha kaba u Myntri Rangbah, u Conrad K Sangma u la ai jingkren. Ka T20 conference kaba tip kum ka “Nature Solves: A New Framework for Our Sustainable Future” kan long kum ka shlemai jingmut na ka bynta ka G20 da kaba wanrah lang ia ki think tank bad ki riewshemphang ba kin iakren shaphang ki polisi kiba iahap bad ka G20.
Ha ka jingai jingkren jong u, u Sangma u la ong, “Kane ka jingialang ka la wanrah lang ia ki riewshemphang ba kin lap ia ki rukom treikam ba iaineh na ka bynta ka lawei. Ki briew jong ka Meghalaya ki don ka jingiadei kaba jan bad ka mariang naduh ki por hyndai. Ngi don ka biodiversity bad ki longshuwa jong ngi ki la iada ia kane ka jaka naduh ki por hyndai.”
U Myntri Rangbah u la kdew sha ka rukom im jong ki briew ka Meghalaya ka bym pynjotia ka mariang bad u la ong ba kane ka rukom im ka iaid ryngkat bad ka Mei Mariang.
“Ngi burom ia ka jingstad bad ka jingryntih ba ka mariang ka pyni ia ngi, bad ngi sngew sarong ia kane. Ki briew jong ka Meghalaya ki lah ban ialam lynti ia ka pyrthei ha ka rukom im kaba pynneh ia ka mariang bad ka lah ban wanrah ia ki jinglong jingman ba thymmai ha ka imlang sahlang bad ka ioh ka kot,” la ong u Sangma.
Ka T20 conference mynta ka sngi ka la sdang da ka jingbatai shaphang ki ‘Lawkyntang jong ka Meghalaya. U Myntri Rangbah u la ong, “Ki ‘Lawkyntang ki bynta kiba kyntang jong ki khlaw bad ki pyni ia ka deiriti ba hyndai jong ngi kaba iada ia ka mariang kaba don nongrim ha ka jingnang jingstad.
Ki don kumba 100 tylli ki ‘Lawkyntang kiba don ha palat 10,000 hectare bad palat 150 tylli ki khlawkyntang ba longtrai da ka imlang sahlang kiba don haduh 2,500 Hectare ha jylla Meghalaya bad ia kine la pynneh bad iada da ki briew jong ngi da ka jingbahkhlieh kaba khlain.
Ka Sorkar jong ngi ka la sdang ia ka Green Meghalaya, kaba long kaba kyrpang bad lyngba kane, ngi ai jingmyntoi ia kine ki kynhun kiba pynneh bad iada ia ki khlaw ki btap. Ngi thmu ban pynneh 2 lak hectare ki khlaw ha kine ki 5 snem ban wan lyngba kane ka prokram.”
U la pynbna ba lyngba ka Centre of Excellence for Climate Change ha Shillong, ka Sorkar ka dang thmu ban pynsaphriang jingtip sha ki khynnah skul bad ki khynnah kolej.
“Ka Sorkar jong ngi ka la sdang ia ka Green Meghalaya kaba long kaba kyrpang bad lyngba kane, ki kynhun ki ioh jingmyntoi haba ki pynneh bad iada ia ki khlaw ki btap. Ngi thmu ban pynneh 2 lak hectare ki khlaw ha ki 5 snem ban wan lyngba kane ka prokram. Ngi dang trei ruh ban kyntiew bad pynnehia ka jingitynnad jong kane ka jylla jong ngi.
Ngi dang wanrah ia ka rukom treikam kaba pura ban ialeh pyrshah ia ka jingkylla ka suinbneng – ka ‘State Action Plan on Climate Change 2.0’. Kane kan iarap ia ngi ba ngin ithuh ia ki jingeh da kaba peit ia ki jingtip ba ioh na ki jingwadbniah ki stad science, ka jingpeit ia ki jingma bad wanrah ia ki rukom treikam ba pura ban pynduna ia kine,” u la ong.
U la ong ruh ba ngi donkam ban kyrshan ia ki sienjam kiba kyntiew ia ki rukom im kiba lah ban iaineh kum ki kam rep kiba khyllie im, ki jingkhyllie ia ki jaka khlaw bad ka jingpyndonkam ia ki tyllong bording ba lah ban pynthymmai. Da kaba leh ia kine, ngin ioh ia ka jingtyllun ki kam ha kaba ka ioh ka kot ka iaid ryngkat bad ka bha ka miat ha ka ioh ka kot.
U Chief Secretary, Meghalaya, u DP Wahlang u la kren shaphang ka jingkylla ka suinbneng bad ki sienjam ban wanrah biang ia ka jingryntih. U la kdew sha ar tylli ki jingjia kiba la pyni ia ka jingkylla ha ka jylla. U la ong ba kumba 40 snem mynshuwa, ki soh niamtra ki long kiba byllai ha kawei ka shnong kaba shakhmat Mawsynram.
Hynrei ha une u snem ba la dep, namar ki jingkylla ka khyndew bad ka suinbneng, ki nongrep ki la shah ktah bha bad ym shym la ioh shuh ia ki soh niamtra. U Chief Secretary u la kdew shuh shuh sha ka jingwan ki refrigerator ha ka jaka jong ki duli. “Mynshuwangim ju don ki pangkha ha ki office bad mynta ngi iohi ia kine. Shibun ki la pher.
U Chief Secretary u la kren shaphang ka Payment for Eco-System Services (PES) jong ka Meghalaya. Kane ka dei ka prokram kaba kyrpang ka ban peit ia jan 50,000 hectare ka jaka hapoh ka PES. “Ngi la pyndep ia ka jingthung ha 17,000 hectare. Ngi kyrmen ba lyngba ka jingiashim bynta ki shnong, ngin pyndep shenia kaba dang sah.
Ngi don ruh ka rukom peit ia ki jaka khlaw kiba don hapoh 1000 tylli ki shnong. Ka don ka jingkhyllie biang ia ki khlaw ha baroh ki jaka nongkyndong. Palat 6,500 ngut ki samla shynrang bad kynthei kin iarap ia ki shnong ban pynthikna ia kane ka jingpyniaid ha ki jaka nongkyndong.
Ka Joint Secretary (G20) ha ka tnat External Affairs, Sorkar India, ka EenamGambhir ha ka jingai jingkren jong ka, ka la kdew sha ki sienjam bapher bapher bad ki jingiakren ba la pdiang kum shi bynta ka G20 presidency.
“Ka jingban jur ka India halor ka LiFE ka paw ha ka phang jong ka India Presidency ‘Kawei ka Pyrthei, Kawei ka Longiing, Kawei ka Lawei bad ka dei ka jingkhot kaba kyrkieh na ka bynta ka jingtrei ia ki kam,” ka la ong.
Na ka bynta ki briew jong ka Meghalaya bad kiwei kiwei ki jaitbynriew ha India, ka LiFE lane ka ‘Lifestyle for Environment’ ka dei ka rukom im jong ki briew bad ka nongrim jong ka ioh ka kot, ki polisi bad ka imlang sahlang.
Ka Meghalaya ka la ialam lynti ha ka ioh ka kot kaba ithuh ia ka jingkordor jong ka mariang bad ka jingiada ia ka. Ki kam jong ka imlang sahlang, ki polisi Sorkar bad ki jingiatreilang bad ki briew kiba don bynta ha kine ki kam ki dei kiba donkam ban tei ia ka lawei kaba iaineh,’ ka la ong.
Ka Think20 (T20) ka dei ka Engagement Group jong ka G20. Ka dei ka shlem jong ki jingai jingmut na ka bynta ka G20 da kaba wanrah lang ia ki think tank bad ki riewshemphang ba kin iakren shaphang ki polisi kiba iahap bad ka G20.
Ia ki jingai jingmut T20 la pynkylla sha ki policy brief bad la ai sha ki G20 working group, ki jingialang ki Myntri bad ka summit ki nongialam ban iarap ia ka G20 ba kan wanrah ia ki polisi kiba khlain.
Ka Meghalaya Basin Management Agency, ha ka jingiatreilang bad ka Observer Research Foundation (ORF) kum ka Think20 (T20) Secretariat hapoh ka G20 Presidency jong ka India, ka la pynlong ia ka Think20 Conference.
Ha kane ka Conference la wan iashim bynta ruh da u Samir Saran, T20 Chair bad President ka Observer Research Foundation, India, ki dkhot jong ki think tank kiba kynthup ia u Shombi Sharp, United Nations Resident Coordinator ha India, bad u Federico Salas Lotfe, Ambassador ka Mexico sha India.
Ki nongthaw polisi, ki nonghikai, ki ophisar bad ki riewshemphang na ki kynhun bapher bapher na 14 tylli ki ri ba long dkhot ka G20 kiba kynthup ka ADB, World Bank, UNICEF, UNESCO, UNDP bad TIPS ki la iawan lang ha kawei ka rynsan ban iamir jingmut bad iatreilang ban pynbeit ia ki jingeh bapher bapher jong ka pyrthei kiba kynthup ia ka roi ka par kaba khuid, ka roi ka par kaba ialam lynti da ki longkmie.
Ka jingbei tyngka na ka bynta ki kam ban ialeh pyrshah ia ka jingkylla ka suinbneng, ki jingpynbeit ba don nongrim ha ka mariang bad ka jingiadei jong ki jingpynkylla bad ka lawei jong ki kam.
Lyngba ka jingdon palat 60 ngut ki nongkren na ki ri bapher bapher, la kyrmen ba kane ka conference kan wanrah ia ki jingiakren bad ki jingai jingmut ki ban iarap ia ka jingpyndep ia ka “Meghalaya Manifesto,” ka policy framework na ka bynta ki jingpynbeit pyrshah ka jingkylla ka suinbneng kiba don nongrim ha ka mariang.
