Shillong, Jylliew 08: U Bah Embhah Syiemlieh MLA jong seng United Democratic Party na Mawlai, u la ong ba “ki lehnoh ki dei ki khun ki pyrsa jong ngi, khot ia kren ia ka seng Hynniewtrep National Liberation Council (HNLC) haba kala tyrwa ban ia kren ia suk”.
Haba kren ha u SP News Agency, u Bah Syiemlieh u la ong ba ka sorkar ka dei ban pdiang ia ka jingkwah ia kren ia suk jong katei ka seng lehnoh, lada ka sorkar ka pdiang kane kan long ka jingjop ia ka sorkar ha kaba wanrah ia ka jingsuk ha kane ka jylla.
U tei u MLA jong ka Mawlai, u la ong ba ka jingkhot ia kren ia ki seng lehnoh haba ki kwah ban wan sha ka miej jingiasuk ka dei ban long kyllum ia baroh la ka dei ka HNLC, ne kiwei kiwei ki seng lehnoh kiba dei na kane ka jylla Meghalaya.
Na ka liang jong u wat ha ka por ba u dang bat ia ka kam kum u general secretary jong ka seng samla pule KSU u la juh kren ba dei ban khot ia kren sha ka miej jong ka jingiasuk, wat mynta kum u MLA u kyntu ia ka sorkar ba kam dei ban khohnioh mynsiem ka dei ban khot ia kren ia seng HNLC.
U la ong ba lada ka seng UDP kan wan ha ka bor ha u snem 2018 kum u nongialam paidbah u kwah ba ka sorkar kan long ka sorkar kaba la kloi lada ki seng lehnoh ki kloi ban wan sha ka miej jong ka jingiakren ia suk. Kumba ka long mynta ka HNLC kala kloi ban ia kren ia suk ka sorkar kam dei ban pynsepei ia kane ka kabu na ka bynta ka jingsuk ha ka jylla.
