Shillong, Naitung 31:U Dr Mukul Sangma u ba long u nongialam ka liang pyrshah ha ing dorbar thaw ain ka jylla hynne ka sngi haba ia kren sha ki nongthoh khubor haba ia dei ka Garo Hills Autonomous District council u la ong ka jingeh kaba ki ia kynduh na ka daw jong ka jingbym ioh tulop ka dei ka bynta kaba donkamban pyrkhat bha, namar kane ka ktah ia ki nongtrei jong ka GHADC la ka dei ha ka jingmut jingpyrkhat ne ha kiwei ki bynta, khamtam haba ki pyrkhat ba ki dei ki nongtrei hapoh ka sorkar.
Shuh shuh u la ong ki nongtrei ha la ka jong ka bynta ki la pynpaw haba ia dei ka jingbym ioh ia ka tulop bad ka jingshisha ha kine ki 42 bnai ki nongtrei jong ka GHADC kim shym la ioh ia ka jingsiew, lah ban sngewthuh haduh katno ki nongtrei ki ia kynduh jingeh.
U Dr Mukul u la ong, ha kine ki nongtrei kiba la bynshet ia ka kam ba ki dei ban pyndep na ka bynta ka jingtrei kam ka GHADC, ka jingktah ka lah ban sngewthuh ba kumno ka District Council ka trei kam, ki nongtrei ki pynlong ia ka jingiakhih, hynrei ki nongmihkhmat kiba synshar ia ka GHADC kim shym la mih sha khmat ban iakren halor kane ka bynta.
U nongialam ka liang pyrshah ka ing dorbar thaw ain ka jylla u Dr Mukul haba ia kren halor ka Meghalaya Residents Safety & Security Act (MRSSA) u la ong ba kane ka ain ka don ia ka aiñ ban iada ia ka jaitbynriew.
U Nongialam jong ka liang pyrshah u Dr Mukul Sangma haba kren halor ka jingduna shuh shuh jong ki dkhot ha ka liang pyrshah u la ong ka Politik ha ka jylla bad ha ka ri ka la kylla.
Kane ka jingduna jong ki dkhot ka Liang pyrshah ka dei hadien ba u MLA ka Mylliem Constituency u bah Ronnie V Lyngdoh u la pher noh na ka seng congres sha ka seng NPP ba ialam ia ka sorkar MDA.
U Dr Mukul Sangma u la ong ba kane baroh ka shong ha ki paidbah kumno kin peit halor ka jingmih jong kine ki seng sain pyrthei kiba thymmai. Kum u nongshong shnong uba sngewthuh ia ka kamram kaba ki dei ban leh haba ia dei ka jingjied ia ki nongmihkhmat, ka jubab ka hikai ia ngi.
U la ong ruh ba la iohi ba u wei na ki nongmihkhmat jong kawei ka seng sain pyrthei uba la pyniasoh noh ialade bad kawei pat ka seng sain pyrthei, ka daw haba ia dei bad kane, ki paidbah ki dei ban peit bad kin rai halor kane.
U Dr.Mukul u la ong ba lada ngi la tip lypa ba u wei na ngi un mareh ha shuwa ban siat ia u kuli kata phin sngewthuh la phin ialam ia u sha khmat ne em, ka Politik ka dei kaba suk ban jied ha ka por kaba dei, ha kano ka por phi donkam ban don ha khmat, namar na ka bynta jong ngi man ka sngi ngi hap ban ia khun na ka sngi sha ka sngi.
