Shillong, Nohprah 28: ka tnad Department of Telecommunications (DoT) kala shim bun ki lad ki kynti kumno ban weng ia ka jingeh jong ki briew kiba pyndon kam mobile kiba dkut noh ha ka por ba dang ia kren kane kala buh ia ki paidbah ha ka jingeh kaba khraw.
Na ka liang jong ki company baroh kiba pyniaid ia ki mobile kila buh palat ia ka 1,30,000 tylli ki tower bad ia ki wei ki lad jingiarap ban pynbun ia ki tower naduh u bnai jylliew mynta u snem haduh kaba kut jong u bnai Risaw. Kala don ka thong ruh ban buh sa 1,50,000 tylli ki tower katban da poi u bnai Lber 2017.
Khnang ban ioh ia ka jingtip na ki paidbah halor kane ka jingeh kaba ia dei bad ki mobile ka tand DoT kala pyntrei kami a ka Integrated Voice Response System (IVRS) hapoh jong ka Nongbah Delhi, Mumbai, Punjab, UP, Uttarakhand, Maharashtra bad Goa ha ka 23 tarik mynta u bnai bad ha kiwei ki bynta jong ka Ri India yn sa leh noh shen.
Kiba pyndon kam mobile kin sa ioh ia ka phone na u number 1955 u ba dei jong ka IVRS bad kin sa kylli jingkylli ia ki paidbah kaei ka jingeh kaba ki ia kynduh ha kaba ia dei bad ka jingdkut noh jong ki mobile ha ka por ba dang ia kren, lane ki paidbah kila ban phah ia ki SMS jong ki sha une u number 1955 da kaba iathuh ia ka jaka kaba ki don la ka dei na sor ne nongkyndong.
U myntri jong ka sorkar pdeng u ba dei peit ia ki kam pahah jingtip u Manoj Sinha, u la ong ba kane ka jingleh jong ka sorkar pdeng ka long ban ioh ia ka jingtip kaba dei beit na ki paidbah khnang b aka sorkar kan sngewthuh kham bniah ia kane ka jingeh kaba ki ia kynduh mynta bad haki por ban sa wan.
