Shillong Jymmang 09: Ki nonghikai skul deficit hapoh ka lama ka Khasi Jaintia Deficit School Teachers Association (KJDSTA) ka pynpaw ia ka jingkmen ban ioh ia ka khubor kaba thikna mynta ka sngi ba u director ka Directorate of School Education and Literacy (DSEL) u la pyntip sha ka seng ba ia ka 1st quarter jong ka tulop ki nonghikai skul deficit la pynlait mynta ka sngi na ka ophis jong ka DSEL na bynta lai bnai jong u Lber haduh Jymmang 2017. Kane ka long hadien ba ki nongialam jong ka KJDSTA ki la iakynduh ia u director ha ka sngi Thohdieng ba la dep halor kane ka kam.
Katkum ka khubor na u Publicity Secretary ka KJDSTA u Babu Kular Khongjirem, ha ka jingshisha, ki nonghikai deficit kim pat ioh tulop mynta bad lada ka sorkar kam pynlait sa mynta u bnai, ka jingduh tulop jongki kan long sha ka lai bnai syndon bad kane ka la buh ia ki ha ka jingeh kiba hap ban kit ia ka iing ka sem bad ka jingbuh skul ia ki khun.
Ha kajuh ka por, u Babu Khongjirem u la pynpaw ba ka rukom pynkiew tulop ka sorkar ia ki nonghikai deficit katkum ka kyrdan pule jongki, kam long kaba ryntih bad ka jinglong kynrum kynram ka rukom ai ia ka advance increment ia ki nonghikai deficit.
Don ki nonghikai kiba la heh kyrdan kiba ioh ia katei ka advance increment bad don pat ki bym ioh ne ki shah pynduh watla ka jingrung ha ka kam ka long ha kajuh ka snem. Kaba kham phylla ka long ba watla kajuh ka skul ruh, don kiba ioh bad don pat kiba shah pynduh watla ki don kajuh ka kyrdan pule jongki.
U la ong ba kane ka la buh ia ka jingeh bad ka jingleh shiliang na ka liang ka sorkar ia ki nonghikai deficit. Halor kane, u director ka DSEL u la kwah ban ioh ia ka kaiphod kaba bniah na man ki sul shwa ba un pynbeit ia kane ka jingbakla bad ban shim ia ka rai kut.
