Shillong, Nohprah 09: Ka jingpynduh noh ka sorkar jong u myntri rangbah duh jong ka Ri u Narendra Modi ia ka lut T.500 bad lut T.1000 tyngka kala ktah jur ia ki lehnoh ha Garo Hills ha kaba u nongialam ka seng GNLA u Baichung Ch Momin u la wan ban pyndem ha khmat jong ki pulit mynta ka sngi ha Chokpot.
U ne u nongialam jong ka GNLA u ba bat ia ka kyrdan ha dien jong u C-In-C u Sohan D Shira mynta ka sngi u la wan ban pyndem ha khmat jong ki pulit bad la rah lang bad u kawei ka AK-47, kawei ka Magazine, 120 tylli ki kuli bad saw tylli ki sim card.
U Baichung u dei u dkhot jong ka ANVC bad u la pyniasoh ia lade bad ka seng GNLA ha u snem 2009 ha kaba u Sohan D Shira bad u Champion Marak kila seng ia kane ka seng lehnoh GNLA, u ne nongialam jong ka seng GNLA u ba la pyndem mynta ka sngi u la bat ia ka kyrdan commander jong ki ar tylli ki District ka West Garo Hills bad ka South Garo Hills District.
Haba kren ha ki pulit ha dien ba u la pyndem, u la kynnoh ba u C-In-C jong ka seng GNLA u Sohan D Shira u la lum ha lade ia ka pisa baroh kaba la lum ha ka kyrteng jong ka seng ha kine ki san snem kiba la leit noh noh bad kane ka la ktah jur ia ka seng lehnoh GNLA ha ka liang ka pisa. Ong ki thymmei khubor.
