Shillong, Nailar 31: Ki saw seng kaba kyntup ia ka KSU, FKJGP, HNYF bad ka RBYF mynta ka sngi kila leit ban ia kynduh ia u myntri ba dei peit ia ka tnad ka rep ka riang u bah Banteidor Lyngdoh ha kaba ia dei bad ka jingmih kyrteng jong ki samla pule ban leit pule B.Sc Agri ha Imphal kaba la long pyrshah ia ka bhah kyrpang jong ka jylla.
U President jong ka KSU u Samla Lambokstarwell Marngar haba kren ha ki lat pathai khubor u la ong ba ka jingpynmih ia ki kyrteng jong ki samla lyngba ka tnad Agriculture ka pynlongngoh shibun haba iohi ba ka long lymbruh lymbram haba ki kren shaphang ka bhah kyrpang, hynrei haba ki peit ba kam dei shuh ka bhah kyrpang hynrei kala dei ka bhah lang.
“Ngi dang khmih lynti ba ki samla ka jylla ban leit pule lyngba kita ki bynta kiba ka sorkar ka don, hynrei kumba ka long kam don jingsngewhun, hynrei kaba don jingklumar, kane kam dei shuh ka jingbakla hynrei kala dei ka jingleh khnang”, la ong u samla Marngar.
Haba ki saw seng kila ioh ban ia kynduh ia u myntri ka rep ka riang u bah Banteidor Lyngdoh bad ka jingiakren ka long kaba sngew tynnad ha kaba u myntri u la ai ka jingkular ba ia kito ki kyrteng kiba la mih ynsa bishar biang .
Na ka liang jong u myntri u la kular ba yn sa pynbeit khnang ba kata ka jingioh rung jongkita ki samla pule ban leit pule kam dei ban noh shiliang. Lada ka noh shiliang, kam dei shuh ka bhah kyrpang hynrei kala dei ka bhalang kane kan sa shimnoh ia ka jingmut jong ka bhah kyrpang ka Reservation Policy.
U President jong ka KSU u samla Marngar u la ong ba kano kano ka tnad sorkar nangne sha khmat kam dei ban ban ia lehkai bad ka jingbit jingbiang jong ki samla baroh kawei, kumba kala mih ka list ha ki lat khubor, tharai ka kyrdan jong ki ophis kaba ki bat ia ka kam kamd ei shuh ka jingbakla kala dei ka jingle khnang ban iuhroit ia ki samla pule jong ka jylla.
Na ka liang jong ki saw seng ki pynrem jur ia ki ophisar kiba pynwan ha kato ka rukom ba pynmih, ha ka jingiakren bad u myntri ka rep ka riang ka long kaba seisoh bad u la kular ban shim khia iakane ka kam ban pynmih pat da kawei ka jingpynbna khnang ba ka jingpule jong ki samla pule ka jylla kam dei ban noh shiliang ka dei ban long kum ba ka long.
Haba ia dei bad ka jingpynbeit jong ka tnad rep na ka liang jong u bah Lambokstarwell Marngar u la ong ba kin nym pdiang ia kata, namar ka dei tang ka jingtap eit miaw ia ka jingle khnang, ka jingkwah jong ki ka long ba ka tnad ka rep ka riang kan shong biang ban jied ia ki ha ka rukom kaba dei ba kin ioh leit pule.
Willbert Rani President FKJGP, u la ong ba ha ka list kaba la pynmih ka long 14 ngut bad kumba la iohi b alai ngut ki bym dei na ka jaitbynriew ki rung lang ha ka bhah bad kane ka jingkhien ka long kaba bakla namar na ki samla pule Garo ki ioh 7, ki Khasi ki ioh saw bad kiwei ki ioh lai kane ka dei ka jingle jubor ban pyni ba kitei ki lai ngut ki rung ha ka bah ki khasi.
Kane ka list kaba mynta ka long ka jingpynkhein ia ka bhah kyrpang ba kumno ki SC bad ki OBC kin ioh rung ha ka bhah jong u khasi Jaintia, ha dien ba la pynshai ba ki ong katei na ka bah kyllum “General Category” bad ka “Open Category” ki pyniapher kumno, kaei kaba ki tip ka long “Open Category” .
Ban rung ha ka bhah kyllum lane kata ka “Open Category” baroh la lah ban rung la u dei u ST, SC lane OBC, hynrei hangne ym lah ban pdiang ka long ba u khasi u ba la heh ka mark u leit rung ha ka bhah kyrpang wat la ki mark kila kham heh ban ia utei u briew ba na bar kane ka jingleh ka long ban pynioh jaka ia kitei ki ar ngut ki bym dei ki trai jylla ia kane ka jingleh kin nym pdiang da lei lei ruh.
Kane ka jingjia kan ktah iaka ioh kam ioh jam kan ktah ia ka bhah pule jong ki samla ka jylla ia kaba kim lah ban pdiang lada peit bha hangto ka dei ka jingpynkhein ia ka bhah kyrpang ia kaba kim lah ban pdiang bad ki kwah ban pan ka jingpynshai na ka tnad rep ba kin pynshai ka ei ka “General Cotegory bad kaei ka Open Category”, haba wat kam ka don ka open category.
Na ka liang jong ki saw seng kin ia kren bad ka sorkar haba ka don bhah ban leit pulit ha ki jaka pule jong ka sorkar pdeng ladei ka dei tang ia ki briew jong ka jylla dei ban leit tang ki briew jong ka jylla, ia kiwei ka don ka ‘Open Category’ kiwei ki jaitbynriew kiba sah ha ka jylla ki lah ban leit pule kim don jingwit ia kata ki lah ban apply na ka open category kam don jingkhang ia ki.
U bah Donal V Thabah General secretary ka KSU u la ong ba ka don kane ka bhah kyrpang kata ka long ia ki ST ia sam 40 la 40 ha pdeng ki khasi bad ki Garo. Ka Open category ka mut kaba khlem mang na ka bynta jong no jong no ruh ka mut ba baroh lah ban rung ha ka open category, lada u khasi u ioh 90% bad kiwei ki jaidbynriew u ioh 89% ia kane run ym nym lahb an pdiang.
Kane ka jingleh jong ka tnad ka reo ka riang ka mut ban ialam bakla hynrei kum ki samla kila sngewthuh ia kane ym lah ban ialam bakla, ka jingjied ia ki samla pule ka dei ban long kumba jeid ia ki samla pule kiba leit ban pule, MBBS, Engineering, B.Pham ka dei ban long kumto kane kaei kaba leh mynta ka long pyrshah ia ki rule ki ain jong ka bhah kam bhah jam jong ka sorkar jylla.
