Shillong, Jylliew 06: Ka Jaoint Action Committee of Social Organization, jong ka South West Khasi Hills District, kaba kyntup iaki khyndai tylli ki seng bhalang, kila leit ban ia kynduh ia u CEM jong ka KHADC u Bah PN Syiem ban dawa na u bay m dei ban ai NOC, ia ka Surok na Nongsyoin sha Wahkaji- Mawthabah lada ka dei na ka bynta ban tih Uranium.
Haba kren ha ki nongthoh khubor ha dien ba kila ia kynduh ia u CEM kane ka JACSO hapoh ka jingialam jong u Bah Wallam Syiemiong kum u Chairman, la iathuh ba kane ka jingiakynduh na ka liang jong kine ki kynhun seng bhalang ki pyrshah lada ka jingthmu shna surok ka long ban tih Uranium, bad kane kala paw na ka jingpynmih hokum jong ka ministry Road Transport jong ka sorkar pdeng.
Kum ka kynhun ki pyrshah ia ka jingtih Uranium ym tang ha katei ka jaka hynrei ha baroh kawei jong ka Ri KHasi, haba ia dei bad ki kam pynroi ka seng ka pdiang sngewbha lada ka wan ha ka lynti kaba shai, ym ha ka lynti kaba dum kum kane ka surok kaba mynta kim sngewthuh kaba long buhrieh.
Ka JACSO ka dawa na ka sorkar pdeng, na ka ophis jong u Myntri rangbah duh jong ka Ri, na u myntri rangbah ka jylla bad kum juh na ka KHADC, ba kan pynshai halor kane ka surok, ka kajingshna ia kane ka surok kan long ban tih Uranium ne ka long da kumwei pat. Lada dei ban tih Uranium ka seng ka pyrshah.
Ha kane ka jingiakren ka seng kyntu ia u CEM ba um dei ban leh kyrkieh ia kane ka kam ka EC ka dei ban da bishar bniah shuwa la da dei ban ai ne kyntait ia kane ka jingpon NOC ban shna ia kane ka surok kaba heh ban leit sha Mawthabah.
La iathuh ba ha kane ka jingiakynduh na ka liang jong u CEM u sap hah ia kane ka jingkwah jong kine ki seng bha sha ka Committee kaba la shna kyrpang na ka bynta kane ka kam shna surok ha kaba u Bah Hedrian Lyngdoh u la ong u Chairman. Ha kane ka JACSO ki seng ki kynthup ia ka SSSS,HYC,HNYF,MIYF,HNYF,WKSU,SPDF,HANM,SSSS UMjarain, FKJGP bad ka SWKYF.
