Shillong, Nailar 19: U Director ka tnad ka koit ka khiah u Dr Aman War u la ong ba imat kala iaid sha ka “Community Spread” kane ka jingpang COVID-19 ha nongbah Shillong bad ha ki bynta ba mandan jong ka West Garo District.
Haba kren ha ki lat pathai khubor mynta ka sngi la iathuh ba na ki jingshim nongmuna na phang kaba la sdang ha ka 16 tarik mynta u bnai kala paw shai ba bun ki riew paidbah kila ioh ia kane ka jingpang.
Ha ka jingshim nongmuna kaba na phang ha ka 16/8/2020 la shim 701 ngut ha Rilbong bad la shem ba kiba long positive ki long 38 ngut, haka 17/8/2020 la leh ha Mawpat la shim nongmuna 78 hangne ki long negative baroh, ha Umpling Lumdiengmet la shim nongmuna 123 baroh ki long Negative.
Ha ka 18/8/2020 la shim ia ka nongmuna na phang ha Jhalupara 150 ngut bad kiba long Positive ki long 18 ngut, Upper Mawprem la shim 140 ngut bad kiba long positive ki long 6 ngut. Ha Anjalee la shim nongmuna 93 ngut bad kiba long positive ki long 6 ngut bad ha Khyndailad ha kane ka juh ka sngi la shim nongmuna na ki 144 ngut bad ki long Negative. Ha Lumsohra la shim nongmuna 94 ngut bad baroh ki long Negative.
Mynta ka sngi 19/8/2020 pat ha Anjalee la shim nongmuna na ki 226 ngut bad kiba long positive ki long 9 ngut, ha Khlieh Iewduh la shim nongmuna na ki 82 ngut kiba long positive ki long 9 ngut, ha Motphran la shim nongmuna 148 ngut kiba long positive ki long 7, ha Khyndailad la shim nongmuna na ki 165 ngut bad la shem ba 3 ngut ki long Positive.
Ha shnong Diengiei kala don ka jingkhlad jong u wei u briew ba niah kali bad une u ba niah kali u leit u wan kylleng kylleng, dei halor kane ka shnong kala kwah ban leh ia kane ka jingshim nongmuna na phang, na ka liang jong ka tnad ka koit ka khiah kala phah ia ki briew bad la shim nongmuna na ki 23 ngut bad baroh ki long Negative.
Haba ia dei bad ka Garo Hills na ka liang jong u Director ka tnad ka koit ka khiah u la ong ba ki bynta ba madan jong ka West Garo Hills kane ka bynta ruh kum ka Trikkilla imat kala poi sha ka Community Spread.
U Director ka tnad ka koit ka khiah u la ong ba ban pynbna ba kala dei shisha kata ka “Community Spread” kin dang hap ban ia shong jingialang bad ia kata kin sa leh ha dien ba la dep ban pyndep ia kane ka jingtest na phang ia ki riew paidbah ha ki jaka kiba la buh ha dien kane ka tnad ka koit ka khiah kan sa shim ia ka rai kaba shai.
