Shillong, Jymmang 20: Hadien ba ki shipai Assam Rifles kila pynphai noh ia ka jaka ba don haduh 106 akar sha ka sorkar Mizoram, u MDC ka Laban-Mawprem u Bah Ricky Shullai u la kyrpad ia u Myntri Rangbah ka jylla u Conrad K Sangma ban tuklar lem bad ka Union Home Ministry bad kumjuh ruh bad ka tnad Defence ban pynphai noh ia ka kmadan kirket sha ka shnong Laban.
Kane kala wan ha ka jingleit ban ia kynduh u Bah Ricky ia u Conrad ha jaka sah u Myntri Rangbah.Haba kren sha ki lad pathai khubor u Bah Ricky Shullai u la ong ba ka jingleit ban ia kynduh ia u Conrad kadei halor ka jingjia ha u bnai Lber mynta u snem ha kaba ki shipai kila pynshai noh ia ka jaka sha ka sorkar bad kane kala pynktik ia ka jingmut jingpyrkhat jong u ban kyrpad ia u myntri rangbah ban kren lem halor kane ka bynta.
U Bah Ricky u la pynsngew ruh ba ka madan kirket kala ai jingshakri bha ia ka Laban Sport Club bad lada ioh biang ia kane ka jaka da shisha kan sa kyntiew bha ia ka kam ia lehkai hapoh ka dong ka thain Laban.
Shuh shuh u Bah Ricky u la pyntip ba kane ka jaka kadei kaba la bna nam bha namar ba ha u snem 1947 la pynbam smai ia u myntri rangbah ka Assam u Gopinath Bordoloi bad kumjuh ruh la pynbam smai ia u myntri rangbah ba nyngkong jonng ka Jylla Meghalaya hadien ba la ioh ia ka jylla lajong.
U Bah Ricky u la iathuh ba na ka liang u Conrad u la ong ba un sa shim khia bad ka ministry bad u la pynpaw ruh ka jingsngewtynnad ia ka jingpynsngew halor kane ka bynta.
