New Delhi, Jylliew 12: Naduh ki shnong bad ki sorbah jong ka India haduh ki lynti iaid bad ki kper ba jyrngam jong ka Oxford bad ka John Hopkins University, ka Skhim National Overseas Scholarship (NOS) ka ai bor ia ki jingiaid lynti jong ki jingangnud ha kylleng ki dewbah.
Ha kawei na ki shnong ba jngai bad ba shah iehnoh beiñ jong ka Tripura, u Dipayan Bhowmick shisien u la angnud ban long u nongsaindur watla u la heh la san jngai na ki lad ki lynti kiba ju ïadei bad ka jingpule shabar ri.
Hynrei lyngba ka jingminot ha ka jingpule bad ka jingkyrshan jong ka National Overseas Scholarship, u Dipayan u la leit ban pule ia ka Master of Science in Architecture bad Urban Design ha ka University of Stuttgart, Germany.
Ka jingsah, jingpule bad jingtrei ha Germany ka la pyni ia u ia ka jinglong kaba iar jong ka pyrthei kaba la pynkylla ym tang ia ka jingsngewthuh jong u ha ka pule puthi, hynrei wat ia ka jingpeit jong u ia ka imlang sahlang, ka jingpynneh pynsah bad ka jingpynroi ia ki jaka sor.
Da kaba ioh mynsiem na ki rukom shna jingshna bad saindur ia ki jaka sor jong ka India bad Germany, u la wan phai biang sha India da kaba kut jingmut ban pyndonkam ïa ka jingnang jingstad jong u.
Mynta, u Dipayan u pyniaid ia la ka jong ka kam shna jingshna, u noh synniang sha ka imlang sahlang lyngba ki kam ba tbit jong u katba u wanrah ruh ia ki lad ki lynti na ka bynta kiwei pat.
U dei uwei napdeng ki spah ngut ki samla pule Scheduled Caste kiba ka jingim jong ki ka la kylla shibun namar ka National Overseas Scholarship (NOS), ka sienjam jong ka Sorkar India kaba bei tyngka na ka bynta ki jingpule postgraduate bad ka kyrdan doktorate ha ki skulbah ba pawnam shabar ri.
Ka Scheme ka kynthup ïa ka bai skul, bai leit bai wan, bai sah bad kiwei kiwei ki jingdonkam ha ka jingpule, ban pynthikna ba ka jingïoh ban rung ha ka skulbah kaba pawnam ha ka pyrthei kam dei kaba la pynshong nongrim ha ki jinglong jingman jong ka ioh ka kot jong ka longïing jong u samla pule.
Ki don da ki spah tylli kum kine ki khana ha kaba ia ka passport la iohi da ki longiing ha ka sien kaba nyngkong bad ki nuksa jong kiba bun ki kmie ki kpa kiba phah ia ki khun shabar ri katba ma ki hi kim pat ju iuh kjat wat ha ki kolej hapoh ka ri.
Naduh u snem 2014, ka NOS Scheme ka la kyrshan ïa ki samla pule na ki longïing kiba kamai hapoh T. 8 lak shisnem sha ki skulbah ha kylleng ki 21 tylli ki ri, naduh UK haduh Germany, US haduh Australia.
Na ka bynta kiba bun kum kine ki longïing, wat ban aplai ban rung sha ka skulbah shabar ri ruh kan jin da la pynlong ïa ki ban leit sha kawei ka cybercafé kaba don hajan.
U Dr. Vaithilingam Rajendiran, uba dei u Senior Scientist, uba la pule PhD ha ka Chemistry ha Oklahoma State University ha America, ula heh la san kum u khun jong ki kmie ki kpa kiba bylla sngi.
U la pyndep ia ka jingpule na skul bad ka jingpule undergraduate na ki jaka pule jong ka sorkar kiba don hajan bad u la mad jingeh ha ka liang ka pisa tyngka katba u dang bteng ia ki jingpule kiba kham shalor.
Hynrei da ka jingkut jingmut bad ki sienjam kiba radbah, u la pyndep ia ka jingpule doctor jong u bad u la iaid shakhmat ban tei ia ka kam kaba ioh jingiaroh bha.
Kaei kaba kine ki samla pule ki wanrah biang kam dei tang ka kyrdan pule ne ka kam kaba siew heh hynrei kadei ka jingkyrmen, ki lad bad ki jingangnud kiba bun na ka bynta ki briew ha ka imlang sahlang jong ki.
Ia ki scholarship kum ka National Overseas Scholarship bunsien la ju peit tang kum ki prokram ai jingiarap pisa. Ha ka jingshisha, kidei ki jingbei tyngka kiba jrong samoi ha ka bor treikam jong ki briew bad ka jingwanrah ia ka jingnang jingtip.
Ki ri kiba la kiew kim shym la shna tang da ki surok, ki jingkieng ne ki kad liengsuin. La shna ruh ia ki ha ki kamra klas. Man la u samla pule uba iaid lyngba ia ki jingeh da kum kine ki scholarship u rah biang ia ka jingshaniah bad ka jinglah ban noh synniang sha ka jingthmu jong ka India ia ka Viksit Bharat@2047. Kane ka dei ka jingmih kaba la pynïasoh lang jong tang kawei ka scholarship.
Ka jingdonkam jong ki scholarship kam shong tang ha kaba bei tyngka ïa ka jingpule hynrei ha kaba wanrah ïa ka jinglong jingman kaba shngaiñ ia ki samla pule kiba ju ïaid lyngba ka pule puthi bad ka imlang sahlang ha ka sien kaba nyngkong eh.
Na ka bynta kiba bun ki nongpule jong ka pateng kaba nyngkong, ka jingeh kam dei tang ban ïoh rung skul. Ka long ban pynneh ia ka jingiaid lynti hadien kata, ban pyniaid ia ki jinglut jingsep ha ki nongbah kiba rem dor, ban thied ia ki kot ne ki tiar digital, ban siew na ka bynta ka jaka sah bad kiwei kiwei ki jinglut kiba don ryngkat bad kum kine ki lad.
Ki scholarship ki long kum ka rukom kyrshan kaba kongsan kaba plie lad ia ki samla pule ban pynleit jingmut ha ka jingpule ban ia kaba khuslai shaphang kum kine ki jingeh kiba man ka sngi.
Ka scholarship ka treikam jar jar. Ki don ki kam ban pynsawa bad ym don ki riew pawkhmat kiba iarap ban pynsaphriang ia ka khubor shaphang kane. Ha ki 12 snem, la jied 764 ngut ki samla pule katkum ka jingnang jingstad jong ki ban ioh rung ha ki kolej ba pawnam tam ha ka pyrthei.
Ha kiba bun ki liang, ka National Overseas Scholarship Scheme ka long kaba pher namar ka jingïarap kaba ka ai sha uwei pa uwei u samla pule. Na ka bynta uwei u riewstad uba pule ia ka jingpule kaba kham halor ha ka skulbah kaba pawnam ha ka pyrthei, ka jingiarap pisa baroh, kaba kynthup ia ka bai skul, ka bai sah, ka bai liengsuin, ka bai insurance bad kiwei kiwei ki jinglut jingsep ha ka por ba pule bunsien ka palat ia ka T. 1 klur bad ka lah ban poi wat haduh T. 2 klur.
Ki don tang katto katne ki prokram scholarship na ka bynta ki paidbah ha ka pyrthei kiba pynlong ia kum kane ka jingbei tyngka kaba heh ha uwei u samla pule na ka longiing kaba don ka jingangnud ha ka imlang sahlang.
Ka jingmut jong kane ka jingkyrshan kam shong tang ha ka jingiarap pisa ba la ai hynrei ka shong ruh ha kaei kaba ka thmu ban pynurlong. Ka thmu ia ka jingkular jong ka ri ban pynthikna ba ki jingeh ha ka liang ka pisa tyngka kan ym khanglad ia ka jinglah ban ioh ia ki lad ki lynti na ka bynta ki samla pule na ki katto katne ki jaitbynriew. Ka long kawei na ki nuksa jong ka jingbei tyngka ha ka jingpule ban kyntiew ia ki lad jong ki briew.
Ka rukom ai scholarship ka India na ka bynta ki samla pule Scheduled Caste, kaba kynthup ïa ki jaka pule ba pawnam hapoh ka ri bad kumjuh ruh ïa ka jingpule shabar ri, ka pynpaw ïa kane ka jingthmu. Ka ithuh ba ka jingkiew ka donkam ia ka jingbteng, ka jingshong shngain bad ka jingkyrshan kaba iaineh.
Ha kiba bun ki shnong bad ki sorbah, ka jingjop jong uwei u khynnah pule ka pynkylla ia ka jingmutdur jong baroh kawei ka pateng. U para uba kham rit u sdang ban pynkhreh ia ki eksamin rung kam da ka jingsngewskhem kaba kham khraw.
Ka shnong ka iohi ba ka jingpule shabar ri kam long shuh ka jingangnud ka bym lah ban pynurlong, hynrei kum ka jaka kaba lah ban poi. Ki kamra klas jong ka Oxford, MIT ne Columbia ki lah ban paw ba ki jngai bha na ki shnong bad ki shnong rit jong ka India. Hynrei lyngba ki scholarship kum ka National Overseas Scholarship, kine ki jingjngai ki nang duna suki suki.
Ia ki aplikeshon na ka bynta ka National Overseas Scholarship la pyniaid da ka Tnad Social Justice and Empowerment. Ki kandidet ki lah ban aplai lyngba ka National Scholarship Portal hapoh shuwa ka 2 tarik Jylliew 2026.
U nongthoh udei u Secretary, Tnad Social Justice bad Empowerment, Sorkar India. Ki jingthoh haneng kidei ki jingsngew shimet jong u nongthoh.
