Tura, Rymphang 13: Ka kynhun kaba la tip kum ka “unified peace movement” ha ki bynta jong ka Garo Hills hapoh ka lama jong ka kynhun seng trei mon sngewbha kila ia kynduh lang ha Tura ban ia kren ka jinglong jingman ha ka shong suk shong sain ha Garo Hills.
Ha kane ka jingialang kila pynpaw ia ka jingsngewkhia ka jong ki halor kane ka jingmih bun ki seng lehnoh ha Garo Hills. Ha kane ka jingialang kila shim ia ka rai ban pynlong ia ka jingiaid paidbah ban wad jingsuk ha ka 9 tarik jong u bnai ban wan ha Garo Hills.
Na ka liang jong kane ka kynhun kala shim ia ka rai ba kin wad kilad ki lynti kumno ban ia kren bad ki seng lehnoh ban khot ia ki sha ka jingiakren ia suk bad ba kin kiar ia ki kam ia umsnam.
Ka nongialam jong kane ka kynhun ka Mariam D Shira, ka myntri barim jong ka sorkar jylla kaba la ialam ia kane ka kynhun bad u headmaster jong ka Don Bosco School, Rev. Fr. Janurias Sangma, u ba la long u nongkhot ia kane ka jingialang.
U nongialam jong ka seng National Peoples’ Party (NPP) u Roger Benny Sangma u khot u wer ia ki paidbah ba kin ia poi lang sha kane ka jingiaiaid paidbah ban wad ia ka jingsuk u la ong ba ka jingshong suk ka long kaba don kam ha kane ka por.
U President jong ka Garo Students Union (GSU), u Tengsak Momin u la ong ba don kam ia ki balang ba kin ia don bynta ha kane ka kam ban wad ia ka jingsuk bad ban pynsngewthuh ia ki seng lehnoh ia ka jingdon kam ka jingshong suk.
Kiwei kiba la kren ha kane ka jingialang ki long u Director jong ka Bakdil, Fr Sunny, U MLA barim jong ka Tura Billikid Sangma ,U Bapun Sangma nongialam jong ka Federation of Khasi, Jaintia and Garo People (FKJGP) baroh ki nongkren ha kane ka jingialang kila ong ba ka kam ban ialeh pyrshah ia ki lehnoh ka dei ka kam jong ka sorkar.(SP News)
