Tura, Nohprah 14: Ki nonghikai skul SSA ha kane ka jylla Meghalaya la shai ka sngi kin shim ia ka rai la kin pdiang ne em ia ka tulop ba thymmai kaba la tyrwa da ka sorkar namar kam long katkum ka jingai jingmynjur jong ka T Ministry of Human Resources Development (MHRD) government of India. Bun na ki nonghikai SSA ki buh ka jingkylli ba lei ka sorkar kam lah ban siew kumba la pdiang da ka sorkar pdeng.
Ki nonghikai SSA ha Garo Hills kiba dei jong ka LP bad UP la shai ka sngi kin pynlong da ka jingiaid paidbah kaba jar jar ban pyrshah ia kane ka jingleh jong ka sorkar jylla ba kam shym la siew ia ka tulop katkum ka rai jong ka Ministry jong ka Human Resources Development (MHRD) jong ka sorkar pdeng.
Ka Approval Board kaba dei ia ka tulop jong ki nonghikai SSA la shong ha ka 22 tarik jong u bnai Iaiong mynta u snem ha Nongbah Delhi bad kala shim ia ka rai ban pynkiew ia ka tulop jong ki nonghikai SSA ia kiba hikai ha ka UP School kan long T.20,493 /- bad ia ki LP School kan long T.19,044/-.
Hynrei ka sorkar jylla pat ha ka jingpynmih hukum ka jong ka ha kine ki sngi ka long ba ia ki UP school kan siew noh T.14.392 /- bad ia ki LP School kan siew noh T.13,335 /- . Na ka liang jong ka seng Meghalaya Sarva Siksha Abhyan School Association (MSSASA), kala ong ban pdiang ia kane ka rai hynrei n aka liang jong ka SSALP bad UPSTA ki pyrshah ia katei ka rai jong ka sorkar.
Na ka liang jong ki nonghikai ha ki Lum kahsi pat kin dang ia shong la shai ka sngi ban shim ia ka rai kaba khatduh la kin pdiang ne kyntait ia katai ka jingtyrwa jong ka sorkar ia ka tulop thymmai ka bym shym la ia hap bad ka rai jong ka Ministry jong ka Human Resources Development (MHRD) Jong ka sorkar pdeng.
