Shillong, Rymphang 05: Ha ka jingleit jngoh ia ka Shnong Mawdem, kaba don ha khappud Meghalaya -Assam, kaba don kumba 160 km kaba la shim por jan san kynta na Shillong, ha ka 3 tarik February 2017, u Bah John F Kharshiing, Co-Chairman, Meghalaya State Planning Board (MSPB) bad Adviser, Kur Kharshiing, u la dap da jingkyndit bad ka jinglyngoh ia ka jingong u Bah Phrowel Dyia, Sordar Rim, Mawdem, uba la synshar ia ka shnong Mawdem 14 snem, haba u la ong ba ki Dyia ki ia dei kur bad ka Kur Kharkongor bad Kharshiing. Ia katei ka jingiadeh kur la kren sakhi ruh da u Bah Emerson Dyia, Sordar Mawdem, Hima Nongkhlaw.
Ia katei ka jing kam kur ki Dyia bad ka Kur Kharkongor- Kharshiing – ka long kaba la ioh jingtip u Bah John F Kharshiing ha u snem 2016, bad ia kaba u la ai jingtip ia katei ka khubor ha ka jingialang jong ka synjuk lang lai Kur Kharkongor, Kharshiing bad Kharlor, kaba la long ha khmat ka Law Kyntang, Mawphlang, ha u bnai Kyllalyngkot 2016, bad kadei halor katei ka jingtip kaba la pynlong ia u Bah John Kharshiing, ban hiar hi dalade sha katei ka shnong ban wad ia ka jingshisha.
Ha katei ka jingiakynduh bad jingiakren U Bah Phrowel Dyia, Sordar rim ka shnong Mawdem, u ba dei uwei na ki riew rangbah kiba la kham rangbah ha ka shnong, ha ka jingiakren bad u Bah John F Kharshiing, u la ong ba naduh ki riew tymmen ki la ong ia u ban kynmaw ban bat skhem ia ka jingiadei Kur Dyia bad ka Kur Kharkongor bad Kharshiing, bad ba ki riew tymmen ki la ong ba da lei lei ruh ym bit ban ia shong kha hadpdeng kitei ki Kur.
Haba la kylli kumno ka la mih katei ka jingiadei kur, u Sordar rim u la ong ba katkum ka jingiathuh ki riew tymmen kham mynshwa, ka long ba ki dei ki Kharkongor kiba la phet bad poi sha kitei ki thain ha ka por thma bah ba ar (second world war), bad la iathuh ba ki dei na ka kpoh kaba la leit long kongor ha iing Syiem mynshwa bad na kata ka jingjia la mih ka jingkynoh bad sin jait Dyia ha katei ka Shnong Mawdem. Ki long ruh ka jaid kur kaba bun paid ha shnong Mawdem (Hima Nongkhlaw). Na ka liang u Bah John F Kharshiing, u la kular ban rah ia kane ka kam ha ka Synjuk Lang Lai Kur Kharkongor, Kharshiing bad Kharlor ban ia thir ia tai bad ban pynlong ka jingtohkit kaba bniah halor kane ka phang.
Ha ka juh ka por, ha katei ka jingleit jngoh ia katei ka thain, u Bah John F Kharshiing, u la pynpaw ia ka jingsngew khia halor ka jingeh ba la pynpaw da u Bah Emerson Dyia, Sordar Mawdem, halor ka jingeh kaba ki paidbah ka thain khap pud khamtam ha kaba iadei bad ka jingsniew palat ka surok kaba kumba 10 km, bad ia kaba ki paidbah ki shem ka jingeh ha kiba bun ki liang namar ka jingbymbiang ka surok.
