Nongstoi, Jylliew, 12: Naduh ba ka Meghalaya ka la ioh ia la ka jong ka jylla haduh mynta ka la kynjoh 42 snem hynrei kat kum ka jingiohlum jingtip da u nongthohkhubor ki dang don haduh 70 % ki shnong kiba dang sahdien ha baroh ki liang la ka long ha ka jing don jong ki ja ka pule,ki surok bad kiwei kiwei ki kam pynroi kiba ka sorkar ka dei ban pynpoi sha ki paitbah khamtam eh ha ki thain nongkyndong.
Myn hynnin ka sngi ha ka jingleit jurip jong u Nongthohkhubor ia ki lai tylli ki shnong ba kyntthup ia ka Kyndonggei,Mawkapiah bad Nonggrim Hills kiba hap ha ka Mawshynrut C&RD Block Rambrai Jyrngam Constiuency la lap tyngkren ba ka sorkar ka la iehnoh bein haduh katta kata ia kitei ki shnong kiba tang ka surok ruh ym don.
Haba phai ha ki skul pat ha kitei ki lai tylli ki shnong ka don lai tylli ki L.P.Skul kawei tang kawei ka Government L.P.Skul ha Nongrim Hills,kawei ka L.P.Skul jong ka Balang Catholic ha Mawkapiah bad kawei ka L.P.Skul ha Kyndongei kaba la seng da ki hyniew ngut shipara kiba la ai kyrteng ka `Iatylli Lang Shpara L.P.Skul` bad kawei ka Upper Primary Skul kaba la seng da kitei ki shipara ha kajuh ka jaka.
Shuh shuh ha katei ka sngi la ioh ban iakren bad ki nongpyniaid jong katei ka Iatylli Lang Shipara L.P.Skul ha kaba ki la pynpaw ia ka jing sngewkhia halor ka jing buhteng jong ka sorkar ban ai jingiarap ia katei ka skul.Haba pyrshang ban twad bniah bha na ki nongpyniaid ia katei ka skul ha kaba iadei bad ki jingiarap ba ki ioh na ka sorkar da kaba bynniaw eh ki la iathuh bad pyni ia ki kot ki sla kiba ka sorkar lyngba ka Office jong u District Mission Coordinator West Khasi Hills ka la kular hynrei haduh mynta ki khlem pat urlong satia kat haduh ba kitei ki nongpyniaid ia katei ka skul ki la ong ba `Dei hangne ba ka ktien tymmen kaba ong Khlein la thang jwat la bam` ka la urlong.
Haba pynshisha ia kata la lap lyngba ki jingthoh kiba ka sorkar ha ka shithi kaba Dt.25th.November.2010 kaba don ia u No.MEGH/SSA/SMAM/PL/42/2010/
Ha ka jingwad jingtip bniah la lap ba ki don 44 tylli ki skul ha ki saw tylli ki block ha West Khasi Hills kata 13 tylli ha Mawthadraishan ,12 ha Ranikor,12 ha Mawkyrwat bad 7 tylli ha Mawshynrut Block kiba hap lang ha ka thup jong utei u snem 2010-11 hynrei ym pat la ioh jingtip lut la kitei baroh 44 tylli ki la ioh ne em ia ki jingiarap kiba pura na ka sorkar kythup ia ki.
Khatduh eh ki nongpyniaid jong katei ka skul ki la ong ba lada ka sorkar ka shu khlein tang ka rmiang shyntur ban pynshlur ia ki Nongkyndong ban seng ia ki skul da kaba ong ka SSA kadei ka mission kaba don ia ka jing thmu ban rat dyngkhong ia ka jingbiej kam don jingmut satia namar lada ka shu bun tang ki jingkular khlem pynrei kam kan poi ka por ba ki heh sorkar kin bun kam satang ha kaba leit khang tala ia ki skul namar ba ki nongseng skul kim shym la seng daka mon la jong hynrei dei da ka jingpynshlur ka sorkar bad haba kim lah kyrda shuh ki hap ban khot ia ki heh sorkar ba kin wan khang khyrdep noh ia ki skul ba ki la seng khang ba kin lait na ka jing shah kynnoh haki kmie ki kpa kiba don ka jing thrang ban phah skul ia ki khun ba kin ioh ia ka jingnang jingstad.(SP News)
