Shillong, Naitung 03: Ka seng ki nonghikai Adhoc ki ba hap hapoh ka shatri Meghalaya Upper Primary School Association (MUPSTA) mynta ka sngi kila ia kynduh ia u myntri ka tnat pule puthi u Rakkam A Sangma ban buddien halor ka jingdawa ban kyntiew kyrdan ia ki 844 ngut ki nonghikai Adhoc Upper Primary Schools shaka Deficit System.
Haba kren sha ki lad pathai khubor u president ka MUPSTA u bah Kenneth Shadap ula iathuh ba ka jingiakynduh ia u myntri ka tnat ka dei ban buddien ia ka jingdawa ban kyntiew kyrdan bad ban iakren ruh halor ki jingeh ba ki nonghikai Adhoc jong ka jylla Meghalaya ki mad.
U bah Kenneth Shadap u la ong, Ka sorkar MDA barim ka la tyrwa ban kyntiew kyrdan ia ki 844 ngut ki Adhoc Upper Primary Schools shaka Deficit System katkum ka Office order memo No. EDN/172/2006/69 Dated Shillong the 7th February/2019 and DSEL/EL/GB/Misc/16/2010/Pt.1/221dated 18.03.2019 bad kum ki nongialam ka MUPSTA, ki leit ban pynkynmaw halor kane ka jingdawa.
U bah Kenneth ula iathuh ruh ba ki nonghikai Adhoc ki shem jingeh ruh haba iadei bad ka jingrit palat ka jingsiew bad kane ka pynlong ia ki para nonghikai ban shem jingeh ban kyrshan ia la ki khun ban bteng iaki jingpule ha bun rukom.
U la kam ruh ba ha ki snem ba la dep ka sorkar ka jingiarap ba ki School ki ioh lyngba ka Grant-in-Aid ruh ka long kaba rit bha bad ka don ruh ka jingshah pynduh ia ka bai Uniform, ka bai iarap pynbha ia ki jingtei hynrei ia kine ki jingiarap, ki school SSA ki ioh khlem da don kano kano ka jingshah pynduh ne pynduna.
U la iathuh ruh ba Haka jingialang ki la kyntu ruh ia u myntri ka tnat ban khmih lang halor kane ka mat ban dang bteng ka jingiarap lyngba ka Grant-in-Aid shaki School Adhoc nalor ka jingdawa kyntiew kyrdan ban pyntrei hok iaka Equal Pay for Equal Work.
U bah Kenneth ula iathuh ba haka jingialang, ka MUPSTA ka la pyntip ruh sha u myntri halor ka jingeh haba iadei bad ka jingthungkam ia ki nonghikai hadien ba la mih bad ba la pynlong ba donkam ban pyndep ia ka MTET ban shah thung kum nonghikai hapoh ki School adhoc.
U la pynpaw ruh, Ki don ki School Adhoc ki bym ioh ban thung nonghikai la palat 1 snem tam namar ba mih ka jingpyntreikam ia ka MTET. Ki don ki nonghikai kiba tbit hynrei ki dei ki bym pat dep ia ka eksamin MTET bad halor kane ki la kyntu ia u myntri ban khmih lem halor kane.
