Shillong, Naitung 09: Ki nongialam ka seng Tour Guide Association of Meghalaya (TGAM) dang shen kila ioh ban ia kynduh ia u chief executive member (CEM) ka Khasi Hills Autonomous District Council (KHADC) ban kyntu ia ka district council ban peitngor ia ka jingtreikam ki Tour Guide Operator kiba na bar jylla ban treikam hapoh u pud u sam jong ka Council.
Haba kren sha ki lad pathai khubor u bah Ialamphang Lyngdoh ba dei president ka TGAM, ula ong ba kane ka jingwan kynduh jongki ia u CEM ka KHADC ka dei ban iakren halor ka jingsdang jyllei ki Tour Operator na bar jylla ban treikam hapoh u pud u sam ka Council khlem da kynjoh ktien shaki Tour Operator trai ri trai muluk.
U bah Ialamphang u la ong ba ka seng ka la shem ba kane ka jingjyllei ka jingmih bad ka jingtreikam ki Tour Operator na bar jylla ka ktah bha ia ki samla trai ri trai muluk ban sengkam lajong khamtam haba iadei bad ka jingkyntiew ia ka kam jngohkai pyrthei.
U la ong ruh ba ka jingkyntu ia ka KHADC ban peitngor ia ka jingtreikam ki Tour Operator na bar jylla ka dei hi ban kyntiew ia ki jong ki samla kiba seng ia kum kine ki kam namar ka jingtreikam kine ki Company na bar jylla ka ktah iaka kamai kajih ki khun samla trai ri trai muluk.
U la ong ruh , ym dei tang ba kine ki Tour Operator na bar jyllla ki ba ktah iaka kamai ka jih ki samla trai ri trai muluk hynrei kaba kham kongsan ka long ba kine ki Company ba na bar, haba ki wanrah ia ki nongwan shangkai suwari sha Meghalaya, ki ai ka jingpyntip bakla halor ki jaka bad ka poi ruh shaka jingpynjot iaki jaka jngohkai pyrthei kiba don ha Meghalaya
U bah Ialamphang u la kam ruh ba ki nongpyniaid iaki Tour Operator na bar jylla kum na Assam kim da tip bha iaka jinglong jingman ki jaka jngohkai pyrthei ha Meghalaya bad kane ka pynlong iaki nongwan shangkai suwari ban duh ia la ka jingim namar ki ialam sha ki jaka shangkai kiba don jingma bad bym long sngngaiñ.
Shuh shuh u la ong, Ki nongwan shangkai suwari ki kynthup lang iaki ba wan wad bniah, ki Researcher lane ki samla pule kiba kwah ban tip kham bniah iaka jinglong jingman ki jaka hynrei namar ba ki wan bad ki Tour Guide ba na bar jylla, kine ki Tour Guide ruh ki poi shaka jingialam bakla iaki namar kim tip bha iaka jinglong jingman ka jaka.
