Shillong, Naitung 14: Ka United Democratic Party mynta ka sngi ka la kynduh ia ka myntri ka tnad aiñ ka kong Ampareen Lyngdoh ban aiti ia ki 8 tylli ki jingai jingmut haba iadei bad ka jingbishar biang ia ka Reservation Policy.
Haba kren sha ki lad pathai khubor u bah Jemino Mawtoh ula ong ba ha ka jingialang bad ka myntri ka tnat aiñ, ka UDP ka la aiti ia ki jingai jingmut kiba bha tam bad kiba lah ban pdiang da baroh ki jaitbynriew kiba don ha Meghalaya.
U bah Jemino Mawthoh u la iathuh ba ka UDP ka la shong jingialang haduh 14 sien ha ka jingdon lang ki stad aiñ bad ki stad ha ka pule puthi ban iakren kumno ban phah ki jingai jingmut shaka sorkar kiba biang tam ia baroh ki jaidbynriew hapoh ka jylla.
Haba kylli kiei kita ki jingai jingmut, naka liang u bah Jemino ula ong, Haka jingialang ka myntri ka tnat aiñ ka la pynpaw ba kam pat long ban pyntip paidbah, ia kita ki 8 tylli ki jingai jingmut ba ka UDP ka aiti shaka Chairperson namar ia kine ki jingai jingmut yn hap ban rah shaka Expert Committee.
U bah Jemino Mawthoh ula ong, watla kam pat long ban pynpaw paidbah ia ki jingai jingmut hynrei naka liang ka UDP ka la dep ban bishar bniah bha ia baroh 8 tylli bad ka Party ka sngew ba kine ki jingai jingmut kim long pyrshah ia kano kano ka jaidbynriew kiba don hapoh Meghalaya.
U la ong ruh, Ngi la ia im lang bad ki jaidbynriew Garo mynta la palat 51 snem bad nga ngeit ba ngi don ka jingiasngewthuh jingmut hapdeng baroh ar jaidbynriew ban wanrah ka jingkylla hapoh ka Reservation Policy kaba lah ban pdiang da da baroh ki jaidbynriew kiba don ha Meghalaya.
