Shillong, Nailar 23: U bah Himalaya Shangpliang MLA jong ka Mawsynram mynta ka sngi u la leit ban ia kynduh ia u symbut myntri rangbah ka jylla u bah Prestone Tynsong ban ia kren halor ki lat jingsumar kiba ia dei hapoh ka konstitwensi.
Ha ka shithi kaba la ai ha u symbut myntri rangbah ka jylla ba dei peit ruh ia ka tnad ka koit ka khiah u bah Himalaya u la thoh shai ba u kyrpad ia ka sorkar ba kan sdang noh ia ka jingtrei ia ka PHC hapoh Sawsymper kumba la dep ban mang ban sdang noh kloi.
Haba ia dei bad ka PHC kaba la dep ban shna pat hapoh Lawbah la kyntu ia ka sorkar ba kan sngewbha ban pyntrei kam noh ia kane ka jaka sumar lada plie noh ia kane ka jaka sumar kan iarap ia ki paidbah ka tei ka thain.
Ka sorkar kala dep ban ai ia ka jingmynjur ban shna ia ki lai tylli ki Dispensary, ka wei ha Weiloi, Jyllep bad Dholai, na ka liang jong ka ophis jong u DHMO jong ka East Khasi Hills District kim pat leit ban jurip ia ki jaka ban shna ia ki Dispensary.
Haba ia ei bad ka CHC ha Mawsynram na ka liang jong u MLA u la kyntu ia ka sorkar ba kan maramot ia kane ka jaka sumar, wat la kane ka jaka sumar ka ioh ia ka khusnam kum ka jaka ba bha eh ha East Khasi Hills hynrei ka dang don shibun ki jingduna ia kaba la dei ban pynbha.
Haba ia dei bad ka PHC ha Ryngku u MLA ka Mawsynram u la kyntu ia u myntri ka tnad ka koit ka khiah ban ker kynroh sawdong ia kane ka jaka ai jingsumar jong ka sorkar namar kumba ka long kane ka jaka sumar kan don jingker kynroh, ka jaka sah jong doctor ruh kala jot la pra ban ker ia kane ka jaka ai jingsumar ka long kaba don kam la thoh u bah Himalaya Shangpliang MLA ka Mawsynram.
