Jowai, Nailar 24: Ka Khasi Student’s Union Jaintia Hills District Unit ka la leit ban buh syntiew ia ki arngut ki dkhot ba shitrhem jong ka KSU kiba la shah siat iap haka kti jong ki pulit ha ka 23 tarik Nailar jong u snem 2000. Ha kaba ki pulit kila pharep ba kine ki ar ngut ruh ki lah ban don kti lang bad ka seng lehnoh.
kine ki Samla ba shah siat iap ki dei u Samla Dawanbiang Shullai Asst Finance KSU Central Body bad u Samla Rocky Shylla Sports Secretary KSU wahthapbroo Unit.
Ia kane ka jingleit buh syntiew la ialam da u Samla Ohibait Dkhar President KSU JHDU, Samla Nangaibormi Sutnga Finance Secretary KSU JHDU bad kiwei kiwei ki dkhot bad Nongialam ka KSU JHDU.
Ia ki syntiew Sah kynmaw la leit buh haka jaka Buh Shyieng metiap ( bouh Chyein) jong ka metiap jong kitei ki Samla ha Iongpiah kaba don ha Jowai.
Hakane ka sngi ka Seng ka la pyllong ruh iaka jingsngew jar ba 1 minit kum ka dak ban pynpaw lem iaka jingsngew sih haba kynmaw iaka jingshah siat kine ki dkhot ka Seng.
Lah ban pynkynmaw ba kine ki Samla kila shah siat haki kti jong ki pulit ha ryngkat bad u Balajied Dkhar ( Hepkhoit) ubadei u ehrang ka HNLC ha Nongshilliang Nongthymmai da kaba ki pulit kila pharep ba kine ki Samla ruh ki lah ban don kti bad ka Seng HNLC ha katei ka por.
