Khliehriat, Nohprah 30: Ka AJYWO Central Body hapoh ka jingialam u Bah M H Dkhar, u President jong ka, ha ryngkat ka jingiadonlang u Bah Justine Dkhar, MLA, Parliamentary Secretary ka Sorkar Meghalaya bad ki nongialam ka KSU Khliehriat Circle naduh u Bah SS Niangti, President bad u Ba C Suja General secretary bad kiwei kiwei de ki ba ia don lang, mynhynnin ka sngi, ha ka por 10 baje mynstep, ka la pynlong ia ka jingkynmawieit ia ka jingdap 154 snem jong ka jingkhlad noh jong U Kiang Nangbah, u Khla-wait ba khraw jong ka Ri Jaiñtia da ka ba pynlong ia ki jingialang barit bad ka jingiabuh-syntiew lang ha u Motdur Sah Jingkynmawieit, ia u ia uba la tei bad pli paidbah dang shen da ka AJYWO Central Body ha ryngkat bad ka jingiatreilang bad ka District Administration, East Jaintia Hills District ha ka New DC’s Office kaba don ha ka Nongbah Khliehriat.
Ha kane ka jingialang ban kynmaw ieit ia utei u Khla-wait ba khraw tam jong ka Ri Jaintia, u Bah Justine Dkhar ha ba ai jingkren, u la ong ba ngi kum ki nong Jaiñtia ngi sngew sarong haduh katta katta ban don ia u ba kum une u khla-wait ba khraw jong ngi u ba la kloi ban aiti ia la ka jingim ha ka jingialeh ban pynlaitluit ia ka Ri jong ngi na ka jingsynshar donbor ka sorkar Bilat ha ki snem 1835 ter ter shaneng. U tei u Myntri Sorkar u la ong ruh ba kaba donkam ia ngi mynta ka long ym tang ban kynmaw ieit ia une u Khla-wait jong ka ri tang da ki jingialang bad jingbuh syntiew, ngi dei ruh ban ialeh ban bud dien ruh ia ki dienjat jong u katba ngi lah ei na ka bynta ka bha ka miat jong ka Ri.
U Bah M.H Dkhar President jong ka AJYWO haba ai jingkren ha katei ka sngi, u la ong ba ka sngi 30 tarik u Nohprah 1862 ka dei ka sngi ka ba dum bad kaba kthang tam ha ka khana pateng, (History) jong ka Ri Jaintia, namar dei ha kane ka sngi ba ia u Khla-wait ba khraw jong ka Ri, la pyniap beiñ noh da ka sorkar bilat, da kaba shu sdien phasi khlem jingisynei ha Iawmusiang Jowai . U tei u nongialam jong ka AJYWO, ha shwa ban buh syntiew ha u Motdur jong u Kiang Nangbah, u la kyrpad ia ka mynsiem jong u Kiang Nangbah, kaba don mynta ha Dwar u Blei mynta, ban kyrkhu ia ki khun ka Ri Jaiñtia bad ruh kham tam eh iaki samla khnang ba kin lah ban bud dien ia ki dienjat jong u katba lah ei na ka bynta ka Ri bad ka Jaidbynriew bad ruh ban kyrkhu ia ka Ri bad ka Jaidbynriew ba kan imsuk im sain bad ba kan roi kyrhai ha baroh ki liang.
Hadien jong kitei ki kiba la kdew haneng kiba la pynpaw ia la ka jingkynmawieit bad jingkynmaw burom da kaba dem bad nguh ha khmat bad buh syntiew ha u Motdur jong u Kiang Nangbah, bud sa kiwei pat ki sengbhalang bad ki riew shimet.
