Shillong, Jylliew 15: Ka seng CSWO, kala kam ba kala iohi ia ka jingtip ba ki pulit jong ka South Garo Hills kila kem ia u Tochang Sangma ha ka 24 tarik jong u bnai ba la dep bad kila bat ha kti jong ki kumba 10 sngi ia kaba la tip kum ka police custody.
U Sangma u dei na Chokpot South Garo Hills, ha ka sngi kaba but ba la kem ia u la rah sha ka Baghmara Police Station bad la kynnoh la shoh la dat ia u haduh ba un da shitom na ki bynta ba shah poh krem jogn ka met.
Ka sentg CSWO kala ong ba une u ba shah kem u la pri da ka snam bad haba u leit jung ruh u liat da ka snam. Ka jingkem ia u ka long ba kila kynnoh ba u don ka jingiadei bad ka seng kiengatiar ka UALA. Ia ka kali Bolero kaba la knieh da ki pulit kam shym la don ha jingthoh kaba ki pulit kila bat ia ka, hynrei kumba ka long mynta ki pulit kila pyndon kam ia kane ka kali.
Na ka liang jong ki kmie ki kpa ki ong ba kumba ka long mynta u Sangma um sngewthuh shuh ia kaei kaba ki ia kren, na ka liang jong ki pulit mynta ki buh ia u Sangma ha Tura Civil Hospital ban phah sumar da kaba the kynjri.
Ka CSWO ka pynrem jur ia kane ka jingleh jong ki pulit kiba khlem pynrkhat shuh ia la long briew man briew bad kane ka dei ka jingpynkhein ia ka hok long briew la ong ka tei ka seng. Ha ka juh ka por ka dawa ba dei ban pynshitom ia ki pulit kiba don kti ha kane kam namar kim long halor jong ka ain.(SP News)
