Shillong, Jylliew 13: Ka seng sain pyrthei National People Party (NPP) kala kynnoh ba ka don ka jingiabamsap ha kaba thied ia u shini ba sam sha ki paidbah lyngba ki dukan rashon ha ka rukom ai kontrak, u myntri ba dei peit ia kane ka tand sam bam sam dih u dei ban hiar shuki noh bad dei ban tohkit da ka CBI la ong u James K Sangma.
La ong ba na ka liang jong ka NPP kan nym pynkut iakane ka kam tang hapoh ka jylla hynrei kan rah ia kane ka kam sha ka sorkar pdeng namar ka sorkar jylla kala thied ia u shini ban ai sha ki paidbah ha ka dor kaba la palat ia ka dor iew dor hat, kumba ka long mynta ka dor shikilo ha iew ba la song plastic ka long T.45 tyngka katba ka sorkar pat kala thied haduh T.54.27 tyngk shi kilo.
Haba pynshai halor kane ka kam sam shini sha ki paidbah ka sorkar pdeng ha u snem 2014 kala pynsngeh ia kane ka jingsam shini lyngba jong ka Food Corporation of India, hynrei kala shah ia ki sorkar jylla ba kin thied hi na iew bad ka sorkar pdeng kan bei pisa tang T.18.50 tyngka ha ka shikilo bad kaba tam kan dei da ka sorkar jylla.
Halor kane ka sorkar jylla kala khot tender lyngba ka tand food civil supplies department ba kino kino kiba kwah ban supply shini sha ka sorkar, naka bynta une u snem 2016 la khot ia ka tender ha 26 tarik jong u bnai Lber bad ki don lai tylli ki kynhunkiba la thep tender, ka Beta Edibles Processing Private Limited coated kala thep T.54270 ha ka shiton kata kalong T.54.27 tyngka shi kilo. Ka Doctor Frozen Food India Private Limited kala thep T.55o50 shiton kata ka long T.55.05/- ha ka shikilo. Kawei pat ka S.S. Food Industries kala thep T. 56210 ha ka shiton bad kata ka long T.56.21/-ha ka shikilo.
Na ka bynta jong une u snem ka sorkar kala ai sha ka Beta Edibles Processing Private Limited ban supply shini kaba la thep T.54270/-. Na ka liang jong ka NPP ka ong ba lada ha iew lah ban ioh tang T.45 tyngka shikilo u shini ka sorkar ba lei kaleit ban thied haduh T.54.27 tyngka shikilo ka shni, namar ka sorkar pdeng ka siew tang T.18.50 tyngka bad ki nongthied ki siew tang T.20 tyngka kaba tam hap sei na ka pla tyngka jong ka sorkar jylla, kane ka dor kaba la thied da ka sorkar ka long kaba la rem sha ba palat.
Ka NPP ka ong ba ka sorkar kala pynsyrwa ei ia ka pisa paidbah haduh T.20 klur ha ka shisnem ka ong pat ym don pisa, ka sorkar ka dei ban ban pynshai ia kane bad ia kane ka kam dei ban aiti sha ka CBI ban tohkit , ka NPP ka kam ba ki don ki kot ki sla baroh bad ki ha kaba ia dei bad kane ka jingkynnoh ka jong ki ba ka don ka jingiabam sap ha kaba thied shini.
