Shillong, Naitung 22: Ka seng ki samla pule ka skulbah North Eastern Hills University (NEHU) hapoh ka shatri NEHU Student Union (NEHUSU) mynta ka sngi ka la pynpaw ka jingsngewdiaw bad ka jingpyrshah halor ka jingrai kyrkieh u Vice Chancellor ban pyntreikam ia ka National Education Policy,2020 ha ka jylla.
Haba kren sha ki lad pathai khubor u finance sectary ka NEHUSU u samla Mandor Diengdoh Swer u la ong ba ki don shibun ki mat ha ka NEP 2020 kiba long kiba sngewtynnad bad kiba shongnia ban kyntiew bad ban wanrah jingkylla ia ka pule puthi ha baroh kawei ka ri India bad jylla Meghalaya.
U samla Mandor u la plong ba ka NEHUSU kam pyrshah iaka NEP hynrei ka sngew ba kane ka rai jong u VC ban pyntreikam naduh 1 tarik Nailar ha baroh ki College kiba hap hapoh ka jingkhmih ka NEHU ka long kaba kyrkieh palat namar ki dang don shibun ki kam ba donkam ban leh na ka bynta ban pynthikna ba ka jingpyntreikam bha ia ka NEP ha Meghalaya ka long kaba iaid beit iaid ryntih.
U la ong ba donkam sa kumba shi snem eiei ban pynkreh iaki jingdonkam na ka bynta ban pynthikna ba ka jingpyntreikam iaka NEP ha Meghalaya kan long kaba seisoh bad kaba iaid beit iaid ryntih.
U la kam ba ki dang don shibun ki College bad ki jaka Pule ha kylleng ka Meghalaya kiba dang duna ki nonghikai kiba tbit ia ki Sobjek bad ki don ruh ki College ha sor bad khap sor ki bym don lut ki tnad Pule.
U vice president ka NEHUSU u samla Easterson Sohtun ula bynrap da kaba ong, kane ka jingrai kyrkieh da u VC ban pyntreikam noh iaka NEP ka paw hi ba une u VC ula shim rai marwei khlem da khein snep ia ka rai jong ka Academic Council jong ka NEHU.
U samla Easterson ula ong ba wat na ka liang u myntri ka tnat pule puthi u Rakkam Sangma dang shen ula kren shai ba ki don ki College ha Meghalaya ki bym pat kot bor ban pyntreikam iaka NEP mynta u snem bad dei namar kane ki nonghikai bad ki samla pule ki sngewdiaw bha halor kane ka jingrai kyrkieh u VC ban pyntreikam noh naduh 1 tarik Nailar iaka NEP ha Meghalaya.
