Jowai, Naitung 16: Ka AJYWO Sengkmie, ka la ong ba ka Jaintia Hills Autonomous District Council, ka dei ban bun ia ki nuksa jong ka Khasi Hills Autonomous District Council (KHADC) ha ka ban khynra Trading License bad ruh pyndam noh shisyndon ka ba ai TL ia ki barjylla bad ki bar ri baroh ki ba leh ia ki kam khaii bad ruh ki ba shong ba sah baroh hapoh u pud u sam jong ka JHADC khnang ban ai lad ia ki briew jong ngi ban ioh phrung khlieh ia lade ha ki kam khaii bapher ba pher ba la bat la baroh shi katta tang da kitei ki nongwei.
“Ngim lah ban len ba ki ba bun hi ki kam khaii naduh ki ba heh haduh kiba rit khamtam ha ka thain East Jaintia Hills District la bat lut da ki barjylla bad ki bar ri Nepali. Kane ka jingiohlad jong ki ban bat lut ia ki kam khaii-pateng ha Ri Lum Jaintia ka la ktah shi katdei eh ia ka ioh kam ioh jam bad ruh ia ka ioh ka kot jong ki nong Jaintia haduh katta katta”, ong u Bah MH Dkhar President jong ka AJYWO Sengkmie.
U Bah M H Dkhar u la bynrap shuh shuh da ka ba ong ba, mynta lah bun bun snem ngim ju bna shuh ba ka JHADC kan khynra TL, PT bad TCC pyrshah ia ki barjylla bad ki nongwei ki ba shong ba sah bad leh ia ki kam khaii-pateng ha Jaintia Hills. Kane kajingleh lyndet jong ka JHADC ha ka ban pynlong ia ka jingkhynra License ba man ka por, ka la pynlong ia kine ki nongwei ha Jaintia Hills ban im laitluid khlem jingteh kyndon bad wan tuid katba ki mon sha Jaintia Hills kat haduh ba kane ka la ktah ia ka ioh kam ioh jam bad ruh ia ka ioh ka kot jong ki nong Jaintia.
“Ka jingkhynra trading License jong ka KHADC ha kine ki por ba la dep hapoh ka jingialam jong ka EC ba thymmai jong u bah Ardent M Basaiawmoit ka long kaba dei ban ai ia ki jingiaroh. Ka JHADC lada ka sngew ba ka ieng na ka bynta ban iada ia ka Jaidbynriew ri paid jong ngi ka la dei ban bun ia ki nuksa jong ka KHADC ha baroh ki liang da kaba sdang noh ban leh ei ei mynta,” la bynrap shuh shuh u Bah MH Dkhar.
Ka AJYWO ka la pynpaw ruh, ba ka ai ia ka jingkyrshan ia ka Jaintia Tribal Traders’ Association (JTTA) halor ka dorkhast jong ka sha u CEM ka JHADC ban dawa na u ban khynra Trading License bad ruh ban ym ai License shuh sha ki barjylla bad ki nongwei khnang ban ai lad ia trai ri trai muluk jong ngi ban sdang noh ia kine ki kam ba la bat la baroh shi katta da ki barjylla.
“Ha kum kane ka por, ba ka NGT Ka la khang tdam ia ka jingtih bad khaii dewiong ha ka jylla, ha kaba da ki phew ki phew hajar ki nong Jaintia ki la kylla long kum ki nongphet wir ba khlem kam khlem jam ha la ka jong ka ri bad shah thngan mynta,, ka AJYWO ka dawa na ka JHADC ba ka la dei ka por ia ka ban pyrkhat thymmai noh mynta na ka bynta ki briew la jong da kaba pynduh TL bad sangeh noh ka ba ai TL ia ki barjylla khnang ban ai lad ia ki briew jong ngi ban sdang la ka kam,” La bynrap shuh shuh u Bah Dkhar.
Shen ka AJYWO Sengkmie ruh kan sa leit ia kynduh ia u CEM ka JHADC ha ryngkat ka dorkhast jong ka ban dawa na u ban pynlong ia ki jingkhynra TL, PT bad TCC ha Jaintia Hills bad ruh ban dawa na u ban ym pynthymmai shuh ia ki license ba ki barjylla bad ki nongwei ki la bat la baroh shi katta bad ruh ban khang noh shisyndon ia ka jingai license ia ki nongwei bad barjylla khnang ban ai lad ia ki briew jong ngi ban ioh phrung khlieh ha baroh ki jaid kam ba la bat da ki nongwei la baroh shi katta, la pymkut u kyrwoh na u Bah M H Dkhar.(SP News)
