Shillong, Jylliew 12: Ka Hima Khyriem mynta ka sngi hapoh ka jingialang jong u Dr Balajied S Syiem, Syiem jong ka Khyrim, bad u Bah John F Kharshiing, Chairman, Grand Council jong ki khlieh nong synshar u ba dei u nongai ktien ruh jong ka, Federation of Khasi States, kila ia kynduh ia u Dr Mukul Sangma, myntri rangbah ka jylla ha kaba kila kyntu ia u ba u dei ban leh ei ei ban peit ba ki iew die masi ha kane ka jylla kim dei ban khang tang na ka daw jong ka jingpynmih hukum jong ka sorkar pdeng.
Ha kane ka jingiakynduh naka liang jong ki khlieh nongsynshar ki hima khasi kila kyrpad ia ka sorkar pdeng lyngba jong ka sorkar jylla ban pyntrei kam noh ia ki kyndon kiba la iatheh, Annexed Agreement of 17 August 1948, ia kaba la ia soi bad pdiang da ka sorkar pdeng bad ka Federation jong Khasi States, khnang ban dup ban pynlait ia kane ka soh kydot kiba la don hapoh jong ka riti synshar jong ka Ri hapoh jong ka “First Schedule of the Constitution of India”. Na ka liang jong ka Federation kala kren shai ba lada ym lah ban pynbeit ia kane kim don lynti da kumwei pat hynrei ki hap ban leit sha ka United Nation ban pan ia la ki jong ki hok katkum ka soskular kiba la ia soi ka IOA & AA.
Ha na ka liang jong kane ka kynhun mynta ka sngi kala ong ba kane ka jingleh ka dei ka jingpynkhien ia ka hok long briew man briew jong ki Rit paid, ha kaba da ki hajar hajar ki briew kin sha ktah ha ka ioh ka kot ka jong ki namar bun ki shah niah ruh ia ka ioh ka kot ka jong ki ha ka kam ri jingri.
Ki Iew syiem , Lyngdoh, Sirdar, Dolloi, Nokma, ha Meghalaya ki long kum ka Smit, Mawhati, Iew rynghep, Lyngkyrdem, Pynursla, Tyrso, Mawlasnai, Mawryngkneng, Sohryngkham, Bhoirymbong, Tyrsad, Maroit, Nongum, Mairang, Nongstoin, Rambrai, Mawkyrwat, Umden, Sohra, Sohiong, Iew Duh, Iew Masi (Raid Marwet), Umdohlun, Markasa, Umsning, Nongpoh, and Partharkhmah, Jowai/Iawmusiang, Iaw Pynsing, Shangpung, Waiajer, Sutnga, Rymbai, Muktapur, Borkhat, Nongjri, Shella, Balat, Mawsynram, Mawdon, kine baroh kin shah ktah la da khang ia kane ka jingshoh doh masi.
Na ka liang jong u myntri rangbah u la pyntip ia kane ka kynhun ba ka sorkar mynta ka sngi kala shim ia ka rai hapoh ka iing dorbar ban phah sha ka sorkar pdeng ban pyrshah ia katei ka jingpynbna jong ka sorkar pdeng namar ka ktah ia ka jingiadei ha pdeng ka sorkar pdeng bad ki sorkar jylla bad ia kane dei ban pynneh pynsah shuwa ba kan dier ka por.
