Shillong, Jylliew 05: Ki nongtrei jong ka Customs, Central Excise and Services Tax, hapoh jong ka lama Meghalaya Staff Welfare Committee (MSWC) mynta ka sngi kila pynlong ia ka jingiakhih ka jong ki ha phyllaw ophis ha Nongbah Shillong ban dawa na ka sorkar pdeng ba ia kane ka ophis dei ban pynneh ha Shillong, ym ban rah noh sha Guwahati.
U wei na ki nongtrei ba rim tam hapoh kane ka ophis u P K Sen haba kren ha ki nongthoh khubor ha dien ka jingiakhih ka jong ki u la ong ba kum ka seng kila leit ban ia kynduh ia ki nongialam seng sain pyrthei baroh, khamtam ia u myntri rangbah ka jylla u Dr Mukul Sangma, u MP ka Tura u Conrad k Sangma, ki nongialam jong ka seng BJP bad kiwei kiwei ki seng sain pyrthei ban ia kren bad ka sorkar pdeng ban pynneh ia kane ka ophis ha Shillong.
Kane ka office jong ka customs kala don ha kane ka nongbah Shillong naduh u snem 1944 bad kala neh haduh kine ki sngi wat la kila don bun ki jingpynkylla ia ka kyrteng. Dei ha u snem 2002 ba ka sorkar pdeng kala kwah ban rah noh ia kane ka ophis sha Guwahati hynrei ha dien ba kila pyrshah la pynneh ia kane ka ophis ha Shillong.
Ki nongtrei hapoh jong kane ka ophis kaba don ha Shillong ki long 195 ngut kynthup ia ki ophisar bad 65 ngut kiba trei sngi, hynrei kine kila trai la palat ia ka shiphew snem lada rah sha Guwahati kine ki 65 ngut kin sa duh ia ka kam jong ki.
Ka jingeh kaba khraw eh ka long ia ki long kmie jong kane ka jylla namar ba ka kynthei ka dei ka nongpeit ia ka iing ka sem ia ki kmie ki kpa kiba la tynmen. Ka jingpynneh ia ka ophis ha kane ka jylla ha ka snem 2002 ka long ha lor kane ka nongrim bad ka jingkwah jong ki ka long ba kane ka ophis ka dei kaba la rim tam ha NE dei ban burom bad pynneh ia ka ha kane ka nongbah Shillong.
