Jowai , Jylliew 09: Ka KSU Laskein Circle ka pynpaw ia ka jingpyrshah jur ka jong ka ia ka jingleh meinah ka sorkar jylla ia ka thain Jaintia halor ka jingmynthi/bym shymkhia ban pynioh noh kloi ia ka BLOODBANK ha Jowai(WJHD).
‘Lada ka sorkar ka buh kloi ia kane ka BLOOD BANK ha Jowai, kan long ka jingkyrkhu ia ki paidbah kiba shah sumar hapoh ka Civil Hospital, ki CHC, PHC, ki Sub-Centre kiba don hapoh ka West Jaintia Hills District baroh kawei’, la pynpaw u President KSU Laskein Circle, samla Fivestarson Suiam.
Ka seng ka la iohi ba kane ka mat ka long kaba kongsan ia ki paidbah nongpang namar baroh shikatta,lada ki donkam snam, ki nongpang ki hap ban leit shaduh shillong kaba ktah bha ia ka Por bad ba buh ia ka jingim u Nongpang ruh ha tmier bad ruh ia ka Pisa pilain khamtam ia kiba duk bad ba wan na ki thain nongkyndong jong ka ri Hynniewtrep jong ngi.
Ka KSU Laskein Circle ka mynjur ban kyrshan ia ka JSU Sengkmie halor ka jingpakhang shnong jong ka ha ka 12 tarik (ba 12 kynta) mynta u bnai ban pynbor ia ki bor sorkar ban pynioh ia ka Blood Bank hapoh ka District.
‘Ka jingbym pynioh ka sorkar ia ka LICENSE na ka tnad ba dei ioh ka pynpaw ia ka jingbymdon jingkitkhlieh ne sngewkhia ka jong ka ia ka iap ka im ka jaidbynriew Khasi Pnar jong ngi. Te ngi sngewiahap ban kyrshan ia ka Pakhang shnong ba la pynbna da ka JSU sengkmie ha ka 12/06/2014’, la pynpaw u samla Leningrad Tariang, General Secretary KSU Laskein Circle.(SP News)
