Shillong, Jylliew 11: u myntri ba dei peit ia ki kam bor ding u James.K Sangma u la iathuh ba la ai por hynriew bnai ia ka MeECL ba kin pyni ba ki lah ban trei ia ka kam
, iakane ka rai la shim hakane ka jingialang kaba la long mynta ka sngi hapdeng ka sorkar, ki director ka MeECL bad ki engineer. Iakane ka jingialang la khot hadien ba ka sorkar kala shim iaka rai ba kan ai iaka jingbah khlieh kaba 100% iaka ram Atnirman loan kaba la shim na ka REC bad ka PFC.
Ha kane ka jingialang la shim ia ki rai na ka bynta ban pynkhlaiñ bad pynbha iaka jingtreikam jong ka MeECL kiba don haduh 4800 ngut ki nongtrei.
U myntri ka tnad bor ding u la pynsngew ba la dei ban ai biang iaka jingthoh shaka MSERC ban kyrpad ban pynkiew iaka bai light ka ba ym shim la pynkiew mynta la bun snem.
La iathuh ruh ba ka jaka pynmih bor ding na umtru kaba la pyntreikam naduh u snem 1957 kane kam shim pynmih bor ding shuh. Na ka liang ka sorkar ka la bthah ban peit aiu kaba lah ban leh iakane ka jingpynmih bor ding. Katba iaka jaka pynmih bor ding kaba dang shna mynta ha Riangdo West Khasi Hills, ka Ganol ha West Garo Hills bad kiwei ki jingtrei kiba dang iaid ban pynbha iaka rukom pynpoi light dei ban ai kaiphot sha ka sorkar.
Ban pynbha iaka rukom shim bai light la bthah iaka MeECL ban peit ruh artad ba ka jingjah ka bor ding kam dei ban dang kiew hynrei ka dei ban shim iaki lad ki lynti ban pynduna iaka. La ai bor ruh ba ka MeECL kan ot beit na phang iaka bor ding elektrik lada kim siew.
Kawei ka rai kaba ka jingialang ka la shim ka long ba kito ki shnong kiba don kumba 300 tylli kiba khlem ioh light namar ba ki pynsah ka bai light mynta yn leit ban pyndait biang iaki transformer ban pynioh light biang sha kito ki shnong, hynrei kito ki iing ba khlm siew iaka bai light yn ot beit.
Haba jubab iaki jingkylli u myntri u la ong ban pyntrei kam iakane yn thaw iaka “village electricity committee” Ban peit ba kan ym don ka jingiatuh light.
Hakane ka jingialang la shem ba ki don shibun bah ki kam ba lait hapoh ka MeECL hynrei kala don ka rai kaba mynshw ba khlem da ioh jingbit na ka tnad kam bor ding ym lah ban thung kam ha kito ki kam ba lait, na ka liang u myntri hakane ka jingialang u la lap ruh ba ki don ki shnat treikam hapoh ka MeECL ki don ki bynta kiba la bun briew palat la shong kai khlem kam bad ki don pat kiba duna shisha ki nongtrei . Ban nym ktah iaka jinglut jong ka MeECL yn shu rah noh iaki nongtrei na kiti ki jaka ba bun briew sha kiba duna ki nongtrei, katba iaki power substation yn buh noh da ki kor ba katkum kane ka juk kiba long automatic ban pyllait na ka jingthung briew.
Ka sorkar kala ai iaka kti kaba laitluid sha ka MeECL ba kan shim iaka rai kumno ban leh ban pynioh biang iaka bai light kaba dang sah la ka dei na ki office sorkar, ki company, ne ki riew shimet laki dei ki Ht lane Lt ba kan shim iaka rai ba yn shah ban siew shiteng shiliang ne ba ki hap ban siew shisien siew la ong u James Sangma.
