Shillong, Naitung 23: U Symbud myntri rangbah ka jylla u bah Prestone Tynsong u la iathuh ba ha ka jingialang jong ka kynhun myntri kaba la long mynta ka sngi la shim ia ka rai ban test noh na phang ia ki paidbah nongshong shnong jong ka jylla ban iada na ka jingsaphriang kane ka khlam COVID-19.
Ha kane ka jingialang jong ka kynhun myntri kaba la pyniaid da u myntri rangbah ka jylla la shim ia ka rai ban bynta ia ka jylla ha ki 71 tylli ki kynhun lane kita ki “Culster” ban sdang noh ia kane ka jingtest naphang ia ki paidbah nongshong shnong.
Ia kane ka bynta la aiti sha ki Deputy Commissioner jong baroh ki District ba kin sdang noh ia kane ka jingtest naphang ia ki paidbah ban iada ia ka jylla na kane ka jingsaphriang jong kane ka khlam COVID-19. Ka jingtest kan long beit da ka Antigent Test Kits.
Kine ki 71 tylli ki kynhun ka kyntup ia baroh kawei ka jylla, ia ka jingpharia kaba bniah la aiti sha ka tnad ka koit ka khiah ba kan leh ia kaba don kam, la bthah ban sdang noh mardor ia kane ka jingtest ha ka jylla baroh kawei.
Na ka liang jong ka sorkar kala bthah ia baroh kito ki 7000 tylli ki COVID-19 Management Committee ba kin ia treilang bad ki bor ka tnad ka koit ka khiah haba ki nongtrei ka tnad ka koit ka khiah kin poi sha ki shnong bad ki don jong ki.
U bah Prestone u la ong ba ka jingshim ia kane ka rai ka long ban iada ia ka jylla na ka jingsaphriang kane ka khlam COVID-19, kumta ka kyntu ia ki COVID-19 Management Committee ha ki shnong ba kin ia treilang bad ki briew ka tnad ka koit ka khiah.
La iathuh ba ia mynta kine ki Antigent Test Kits kila don 40000 tylli ha ka jylla bad ki ban dang poi mynta kiba la don ha lynti ki long 1,60,000 tylli. U Bah Prestone u la bthah bad pynkynmaw biang ia ki shong ki thaw bad kham tam ia ka COVID-19 Management Committee ba kin but ryntih ia ki jingbthah kiba ka sorkar kala dep ban pynmih.
