Wapung, Naiwieng 27: Ki ar tylli ki Dorbar Shnong kata, ka Dorbar Shnong Wapungskur bad ka Dorbar Shnong Wapungshnong, East Jaintia Hills, ki la pynpaw ia ka jingsngewnguh kaba khraw haduh kata katta ia u Bah Justine Dkhar, MLA, uba long ruh u Nongmihkhmat na ka 6th Khliehriat, LA Constituency halor ka jingtrei shitom jong u met bad mynsiem ban pynkynriah noh ia ka Khliehriat C & RD Block sha ki thaiñ Wapung da ka ba jer kyrteng thymmai pat ia ka kum ka Wapung C & RD Block.
Kum ban shu pynkynmaw, u bah Justine Dkhar, mar sien shah jied ha u snem 2013 kum u Nongmihkhmat sha ka Iing Dorbar Thaw Aiñ jong ka Jylla Meghalaya, na ka 6th Khliehriat LA Constituency, kawei na ki mat kiba u la buh ha khmat eh ban pyndep na ka bynta ka bha ka miat jong u paidbah ka long ban pynkynriah noh ia ka Khliehriat C & RD Block kaba la don la baroh shi katta ha Khliehriat, kaba dei ka Nongbah jong ka East Jaintia Hills District, bad da ka jingtrei shitom jong u tei u MLA, katei ka jingthrang jong u na ka bynta ka jingmyntoi u paidbah, ka la urlong shisha.
Bah Dkhar MLA, Parliamentary Secretary jong ka Sorkar Meghalaya, da ka jingtrei shitom jong u miet la bad sngi, khlem shong thait, kum u Nongmihkhmat jong katei ka thaiñ ha ryngkat ka jingiatreilang bad ki ar Dorbar Shnong, kata, ka DS Wapungskur bad ka DS Wapungshnong kiba la kloi ban pynioh jaka ei ia ka sorkar jylla na ka bynta katei ka jingthmu, u la pyhun shisha jrut ia u paidbah thaiñ Wapung da ka jinglah jong u ban wanrah ia katei ka C & RD Block ha katei ka thaiñ.
Lyngba ka jingtrei shitom bad duriap jong u Ma Justine Dkhar, MLA, ka Sorkar Jylla, lyngba ka Notification No. CDD.129/2014/37, Dated: Shillong, the 18th November, 2016 jong ka, ka la pynbna paidbah, ba ia ka Khliehriat C & RD Block: Khliehriat, la pynkynriah noh sha ka thaiñ Wapung ia kaba yn tip pat da ka kyrteng ba pura jong ka kum ka “Wapung C & RD Block: Wapung”, naduh katei ka sngi ba la pynbna.
“Ngi ki ar Dorbar Shnong, kata, ka DS Wapungskur bad ka DS Wapungshnong ha ryngkat bad u paidbah jong ka thaiñ hi baroh kawei, ngi pynpaw ia ka jingsngewnguh kaba khraw haduh katta katta ia u bah Dkhar, MLA, halor ka jingtrei shitom jong u mynta lah ar snem tam ban pynioh noh ia katei ka ophis, ka ‘Wapung C & RD Block: Wapung’ ha ki thaiñ Wapung.” ong u Ma Satly Ryngkhlem bad u Ma Glitter Rymbai, ki ar Waheh Shnong jong kitei ki ar shnong. Kitei ki ar tylli ki dorbar shnong ki ai khublei ruh ia u myntri rangbah ka jylla u Dr Mukul Sangma, ia u MDC jong u bah Phasmon Dkhar kiba la trei shitom n aka bynta ban pynurlong ia kane ka jingangnud jong ki paidbah.
