Shillong, Jylliew 28: Ka ophis jong u Deputy Commissioner East Khasi Hills kala ioh jingtip ba don ki briew kiba la bret pathar ia ki niut ki nier ha shilynter jong ka surok bah GS Road kham tam eh ha jaka jngohkai ia ka Umiam kaba don ha Mawiong bad kane kala pynjaboh ia ka mariang.
Ban khanglad ia kane na ka liang ka ophis jong u Deputy Commissioner jong ka East Khasi Hills District u la pynjari ia ka kyntdon 133 CrPC ban pynbna ba ka jingbret ia ki jaboh jabain ha kane ka bynta ka long wanrah ia ka jingwit ia ki ba iaid ba ieng.
Na ka liang jong ka ophis u DC kala ong ba lada don mano mano ba lap ia kiba bret niut ka ain kan sa leh ia kaba don kam bad kane kan trei noh naduh ka 5th Naitung 2017. Na ka liang jong ki bor jong ka District ruh ka kyrpad ia ki paidbah ba kin ai lem ka jingkyrshan ha kane ka liang baroh ban pynneh pynsah ia kane ka jaka ba kan long kaba khuid.
