Shillong, Naitung 08: U Director ka tnad ka koit ka khiah u Dr Aman War u la iathuh ba ka tnad ka koit ka khiah haduh mynta ka sngi ka lah ban lap 44 ngut ki briew kiba don ka jingiajan bad ki ar ngut ki briew kiba la ioh ia ka jingshitom COVID-19 kiba la wan ban iathoh na Greenwood Resort na Assam.
Haba kren ha ki lat pathai khubor la iathuh ba kine ki ar ngut kiba la test COVID-19 positive, ki long u wei na Lachumier bad ki briew kiba ia jan bad u haduh mynta ka sngi la lap ba ki long 21 ngut bad ia u bah na Pynthor la lap ba kiba ia jan bad u ki long 23 ngut.
U Dr War u la iathuh ba ka jingwad ia ki briew kiba don ka jingiajan bad kine ki ar ngut ka dang iai beteng haduh mynta ka jan miet bad kane ka jingwat kan dang iai beteng shuh ba la ong ba kan dang lah ban kiew ki briew kiba don jingiajan bad ki tei ki ar ngut ki briew.
Ka tnad ka koit ka khiah kala rah ia ki baroh bad mynta la buh ia ki ha ki jaka quarantine kiba la buh kyrpang da ka sorkar. Ki briew kiba la ioh ka jingpang COVID-19 kiba wan na Greenwood ki long lai ngut u wei u ba trei shet ha katei ka jaka bad ar ngut kine kiba na Shillong.
Na u tei u ba trei kum u nongshet hapoh kata ka Resort ba dei na Ri Bhoi kiba ia jan bad u la test COVID-19 Positive 13 ngut bad baroh kiba la ioh ia kane ka jingshitom kaba dei na ka Greenwood Resort ki long 15 ngut.
