Shillong Naitung 16: Ka jingïaid lynti lyngba kiba bun ki dieng pyngkiang ban wanrah ka jingkylla ha ka imlang sahlang jong ka jaitbynriew Khasi ka dang ïai bteng hi wat hadien ki arphew san snem kiba la leit noh, hynrei ki nongïalam lem bad ki para dkhot jong ka seng Syngkhong Rympei Thymmai (SRT) kim shym la kynran dien satia.
Da ka jingplie pyrda ïa ka jingrakhe jong ka jubili rupa jong ka, ïa kaba la pynlong hynne ka sngi ha Conference Hall jong ka KJP, ha Barik, ha kaba u bah Latiplang Kharkongor, Executive Member jong ka Khasi Hills Autonomous District Council (KHADC) in-charge Trade, u la long u kongsan, ka SRT ka la kynjoh sa sha uwei pat u mawjam, ban ïaid shakhmat ha ki thymmei pyrkhat kiba yn wanrah ïa ka jingkylla ha ka lawei jong ki longdien jong ka jaitbynriew.
Ka jingplie pyrda ha kane ka sngi ka la long ha ka dur jong ka debate, lane ka jingïatai nia halor ka mat phang, “Ka Jingleit Shongkha u Shynrang Sha ïng ka Kynthei ka Sloit ïa ka Iktiar,” ha kaba khatar ngut ki samla pule jong ki hynriew tylli ki kolej ka nongbah ki la ïa shim bynta shit rhem.
Na ka liang kiba kyrshan ïa ka motion ki la sei ïa la ki jongki daw, katba ka liang kaba pyrshah ïa kane ka la sei ïa la ki jong ki daw ban pynksan nia.
Haba kren kum u kongsan ha kane ka sngi u bah Latiplang Kharkongor u la pynpaw ka jingdiaw ba ka la don shisha kata ka jinghiar dor ha ka imlang sahlang namar ka jingshah ïuhroit bad shah ñion beiñ bad u la ong ba kum ka jaitbynriew ngi don la ka jong ka mon ba laitluid ban jied namar ym don ka aiñ ban khang.
“Ha kum kane ka juk shai, ym don ba lah ban khang satia ïa ngi ban leh ïa kano kano na bynta ka jingbha jingmiat jong ka imlang sahlang,” ong u bah Latiplang bad bynrap, “Dei kum kane ka lympung ïatai ïathir ba yn sa lah ban ïoh ïa ka rai ban pyndap haba duna bad weng haba tam,” la ong une u kongsan.
Haba wai ka jingïatai, ka liang pyrshah ka la jop, namar bun ki nongïashim bynta kiba don lang ki la sngew ïahap bad la liang pyrshah. Ïa ka nam lahduh ha ka rukom tbit ban ïatai la rah da i Bahunlang Nongkhlaw jong ka Sanker Dev College, iba la pyrshah ïa ka motion, la bud sa da u samla Nangïaisan Kharlukhi jongka St Anthony’s College bad u samla Precious Full Shabong jong ka Sanker Dev College kiba la kyrshan ïa ka motion.
Ki nongbishar ki kynthup ïa i Professor Fairy Ropmay, Professor Benjamin Lyngdoh, bad i Professor Streamlet Dkhar. La pynïaid ïa ka lympung ïatai da u babu S Loniak Marbañiang.(SP News)
