Nongpoh, Jylliew 20: Ka Khasi Students’ Union (KSU) hynnin ka sngi ka la ioh ban pynskhem noh ia ki unit jong ka kiba don ha them Ri-Bhoi, hadien ba la pynthymmai noh ia ki nongkitkam jong ki unit jong ka kiba dei na Umjarasi, Nartap, Pahamsyiem bad Mawroh.
Ia katei ka jingpynskhem ia kitei ki nongkitkam jong ki unit la pynlong hynne ka sngi ha ophis treikam jong ka KSU ha Miawdiangum, Nongpoh, Ri-Bhoi district, ha kaba la pynskhem ia ka da u Samla Lambok Star Marngar, finance secretary ka seng kmie.
Kiba la sakhi lang ha katei ka jingialang pynskhem unit ki long u Samla Eric Kharjana, office secretary ka seng kmie, u Samla Rudy L.Tron, asst organizing secretary ka seng kmie lem bad ki nongkitkam ka KSU NKHD ba kynthup ia u Samla F.K Kharkamni, president bad u Samla Vincent Makri, general secretary bad kiwei kiwei de.
U Samla Marngar shuwa ban pynskhem ia kitei ki nongkitkam, u la ong ba ka ILP ka dang treikam ha Rilum Khasi Jaintia bad kane ka ishu ka dang shitrhem ban dawa na ka sorkar ba ka dei ban pyntreikam noh mardor katkum ki jingdawa jong ka seng bad kiwei pat ki seng bhalang hapoh ka Ri Khasi baieid jong ngi.
Katei ka jingdawa ka dang im namar ngi kwah ban iada ia ka ri na ka jingshah iuhroit ha kiwei pat ki bor jong ki bar jylla kiba kwah ban kjit ia ka spah ka phew jong ka Rilum Khasi Jaintia kum ki thliem kjit snam, u la ong.
U la kyntu namarkata ia ki dkhot ba thymmai bad ki nongkitkam bathymmai jong ka Union ba ki dei ban trei shitrhem na ka bynta ka ri bad ka jaidbynriew ban iada ia la ka ri na kiba kum kitei ki bor bad ki dei ruh ban kiar raimaw raidieng na ki kam sniew kiba
ktah ia ka imlang sahlang.
Ki president bad secretary ba la pynskhem da utei u nongialam ka KSU seng kmie ki kynthup ia u Samla Ioanis Lapang, president bad Samla Teilang Maring secretary ka Nartap Unit lem bad 18 ngut ki dkhot, u Samla Baiashanlang Kharshanlor, president bad u Samla Banker Warbah, secretary jong ka Pahamsyiem Unit ryngkat bad 22 ngut ki dkhot, u Samla Dening Khymdeit, president bad u Samla Easterwell Lyngdoh, secretary jong ka Umjarasi Unit, lem bad 20 ngut ki dkhar u Samla Cornelius Shadap, president bad u Samla Anthony Rymbai,secretary jong ka Mawroh Unit lem bad 30 ngut ki dkhot.
Haba la kheiñ lang ia baroh, ki la jan kot spah ngut ki samla kiba la iasoh bad ka KSU lyngba ki tnat treikam jong ki na ki shnong bapher bapher ha katei ka jingialang.(SP News)
