Mairang, Naitung 04: Kum shibynta ban kyntiew ia ka kam pule puthi lyngba ka jingpyndonkam ia ki bor teknoloji, ka ophis jong ka Block Development Officer, Mairang C &RD Block, Mairang hynne ka sngi ka la ioh ban pynlong ia ka prokram sam M-Tab hapoh ka skhim Chief Minister’s Digital Learning Aid Scheme sha ki khynnah Class XI jong u snem 2022-2023.
Ia kane ka jingsam ia ki M-Tab la pynlong ha St. Thomas Higher Secondary School, Mairang ha kaba u Bah Metbah Lyngdoh uba dei u Chairman jong ka Meghalaya State Planning Board bad ruh u MLA ka thain u la leit kum u Kongsan ha ka jingsynran lang jong u Deputy Commissioner ka Eastern West Khasi Hills District, u Bah G. Kharmawphlang uba la leit kum u symbud kongsan.
Ha kane ka prokram la sakhi ruh ia ka jingdonryngkat jong ka BDO ka Mairang Block, ka Dr L.R Hynniewta, u Sub- Divisional School Officer, Mairang, u Bah J. Thyrniang, kiwei kiwei pat ki nongtrei sorkar, ki nonghikai bad ki khynnah pule jong ki skul bapher bapher jong ka Mairang Block.
Haba kren kum u kongsan ha kane ka prokram, u shongknor jong ka Meghalaya State Planning Board uba dei ruh u MLA ka thain, u Bah Metbah Lyngdoh u la ong ba ki khynnah pule ki long ka lawei jong ka imlang sahlang bad kumta ki dei ban trei minot ban ia ryngkat bor bad ki khynnah pule na kiwei pat ki bynta jong ka pyrthei.
Haba ia dei bad ka rukom pyndonkam ia ka jingstad teknoloji ha ka pule puthi kaba man ka sngi ka jong ki bad u la kyntu ruh ia baroh kiba ia sakhi lang ia kane ka prokram ba kin pdiang ia kiei kiei kiba bha ba ka bor teknoloji ka wanrah ha ka imlang sahlang .
U bah Metbah u la ong ruh ba ka long ka kabu kaba khraw ia ki khynnah pule ba kin iohpdiang ia kiba kum kine ki lad jingiarap kiba ka sorkar ka ai khlem kano kano ka jingsiew pisa bad ha kane ka prokram.
U bah Metbah u la kren ruh shaphang ka jingkyrduh kam kyrduh jam kaba long kawei na ki mat kaba donkam bha ban iatai ha ka ri bad ka jylla bad ula kyntu ruh ia baroh ba kin ym khmih lynti tang ia ki kam sorkar hynrei ba kin thawlad ia kiwei pat ki rukom kamai jakpoh.
Katba, u symbud kongsan, kata u Bah G. Kharmawphlang uba long u Deputy Commissioner ka Eastern West Khasi Hills District, u la kyntu ia ki khynnah pule kiba la iohpdiang ia ki M- Tab ha kane ka sngi ba kin pyndonkam hok iaki na ka bynta ban kyntiew shuhshuh ia ka pule puthi ka jong ki.
Kiwei kiwei ki bynta jong kane ka prokram ki kynthup ia ka jingsam khusnam na ka bynta ki nongjop ha ka jingiakob dro jingdro bad jingiakob thoh poitri ia kiba la pynlong kum shibynta jong ka jingrakhe ia ka sngi pynneh mariang kaba mynta u snem.
