Shillong, Iaiong 12: Ka shad suk mynsiem kaba 104 jong ka seng khasi ka ban long lai sngi lynter kala sdang mynta ka sngi ha lympung madan Weiking, ha ryngkat ka duwai ka phirat na ki tynmen ki sam jong ka seng Khasi.
Ia kane ka sngi sdang jong ka shad suk mynsiem la tip kum ka sngi iouh kjat, ia ka jingsdang la pynlong ha ing seng khasi ha Mawkhar da ka jingduwai kaba la pyndep da u president ka seng u Bah M F Blah, ha dien kata la don ka jingiaid paidbah sha Madan Weiking.
Ha kane ka lympung shuwa ban sdang ka jingshad la pynlong ia ka jingduwai da u Rangbah Debren Syiemlieh bad pynkut da u rangbah Skor. Kane ka jingshad ka long ka jingainguh ai dem ia u nongbuh nongthaw bad ha kajuh ka por ban kyrpad ia u kynrad ban kyrkhu kyrdoh.
Ha kane ka sngi sdang da ki spah ngut ki thei bad ki rang kila poi na kylleng ka ri khasi ban ia shim bynta ha kane ka shad suk mynsiem kaba shi sien shisnem.(SP News)
