Mairang, Naitung 17: Ka Hima Nongkhlaw ka la rai ban rakhe kynmaw burom ia ka lyngkhuh sngi iap u Tirot Singh ha ka 18 tarik mynta u bnai namar ba ka 17 ka hap ha ka sngi u Blei. Ka jingrakhe kan neh baroh shi sngi ha kaba ha ka por 10.30 AM yn pynlong ka jingbuh syntiew ha u Mot Tirot, 11 AM yn pynlong ia ka jingialang paidbah. Ha kane ka por nalor ka jingkren u Chief Guest u Bah P N Syiem, CEM, KHADC yn sam ruh ia ka Tirot Singh Award sha ki nongrwai ba pawnam kaba ka Hima ka la pynmih bad ruh ia ki khynnah kiba wan shakhmat ha ka jingpule jong ki ha ki result ba pher ba pher.
Ha kane ka sngi kan don ka jingiakop rwai bad shad tynrai jong ki khynnah skul ha ka por 1.00 PM ban pynbud da ka jingiakob siat khnam jong ki shnong hapoh ka hima bad hadien kata ha ka por 3.30 PM ki paidbah kin iohsngew ia ki jingrwai ieit Ri ba la jer la khot kum ‘Ki Sur Na Krem Tirot’ ban iarwai lang da ki spah ngut ki nongrwai ha kajuh ka por ryngkat bad ki jingput jingtem ba bun jait.
Ha kane ka sngi ki nongrwai ba paw khmat kum ki jong u Bah Heding, Bah Banker, Bah Phyrnai, Bah Fedrick, Bah Gulshan, Kong Lumtimai, Kong Mana C Kharhunai, ka group jong ki khun u Bah Skhendrowell Syiemlieh, nangta ka kynhun tem jingrwai tynrai jong u Bah Lamphang Syiemlieh bad kiwei kiwei kin pynkhih ia ka mynsiem jong ngi da ka jingrwai ieid Ri jong ki.
Ka jingpynkhreh ia kane ka jingrakhe kynmaw burom ia u Tirot Singh da ka Hima ka la biang nadong sha dong. Ki paidah ki bym lah ban wan naduh mynstep ki lah ban wan ha ka por janmiet ruh kam pher tangba shu long ioh ba ki duh noh ia ki jingbam tynrai na ka IEW TYNRAI ba la pynkhreh da ka hima. Kumta ka Hima sa shisien pat ka khot ka wer ia ki khun ka bri hynniew trep ban iapoi lang ha katei ka sngi kum ka dak jingiatylli bad burom ia u Khla ka wait jong ngi U Tirot Singh.
